Pathianni zanah Milan Derby
Football club inhal leh inngeih lo thlang dawn ila Inter Milan leh AC Milan te hi sawi lan zingah an tel ang. Mahse, Italian club lian pahnih hian khelmual an inṭawm mauh mai bawk si - Pathianni zan dar 12:15 hian an intawng ang.
San Siro Stadium-ah an inkhel dawn a, tun ṭum atan chuan Inter Milan hi mualneitu an ni dawn, hei vang hian Inter ṭantuten ticket an nei tam zawk dawn tihna a ni - Milan chu mikhual team zawk tur an ni.
Tun dinhmunah chuan team pahnih dinhmun hi a inang vak lo. Serie A match li an khelh tawh chinah Simone Inzaghi enkawl Inter hian point riat hmuin pathumna an ni, hetih lai hian Milan erawhin point nga chauh an la hmu thung.
Inzaghi enkawl Inter hian Champions League lamah Manchester City an dangchat thei a, khawvel striker ṭha leh hlauhawm Erling Haaland leh a ṭhiante an ven theih avangin Milan hmatawngte tan awlsam taka paltlang theih an ni dawn lo.
Milan erawh tun dinhmunah chuan team nem zawk tura ngaih an ni, season bul an ṭan fuh tawk lo. Serie A match an khelh hnuhnungah chak mah se, UCL-ah Liverpool an ngam lo zui, insiamṭhat an mamawh hle.
Paulo Fonseca naute hian boruak ṭha an mamawh, an striker hlui Zlatan Ibrahimovic chuan Ningani khan Milan hi a tlawh a, coach Fonseca nen an inkawm bakah player ho hmaah thu a sawi, hei vang hian an training ṭan hun pawh tih khawtlai a ni hial.
Ibra hian tun hmain Milan hi Serie A nomawi a lo chawipui tawh a, tun ṭuma an hmachhawn tur Inter tan pawh hian a lo khel tawh. Tawnhriat a nei ṭhain Milan Derby boruak pawh a hrechiang hle, inkhel boruak sang an tawn dawn lai taka a tlawh hi Milan tan thil ṭha a nih theih a rinawm.
Kar tawp inkhel tur dangah Juventus chuan Napoli an mikhual dawn - team ṭha pahnih te hi zanin dar 9:30 hian Allianz Stadium-ah an inkhel ang. Mipui ngaihven tur chu Antonio Conte a ni dawn, tun hma lama hlawhtlinna a lo chanpui tawh Old Lady a hmachhawn dawn a ni.
Conte hian Napoli dinthar leh a tum mek a, hun rei lote chhungin danglamna a thlen bawk - Naples club hi an match hmasaah chak lo mah se tunah chuan vawi thum an chak leh tawh a, point kua hmuin pahnihna dinhmun an luah mek.
Italian manager Conte chuan, "A hma lama ka sawi tawh ang khan nipui bazar a tawp har deuh a, chuvangin team tin mai hian mahni khelh dan phung nghet nei turin kan la inpeih hman meuh lo. Kan player ṭhenkhat chu tun hnai lawkah an rawn kal ve chauh.
"Kan tan chuan match tin mai hi fiahna a la ni zel, tun ṭuma kan inkhelh turah pawh hian rinkai zawk kan awm lo. Ka hmuh dan chuan eng team zawk pawh chak se la lawm taka awm thei ve ve tur kan ni ang," a ti a, a naute a rintawk thu a sawi tel bawk.