Kawng dik kan zawh mek - Marquez

Marc Marquez chuan tun season kal lai atan a hun ṭha leh duhawm a hmang mek a, amah leh a team Gresini Ducati chuan kawng dik an zawh mek tih a sawi.

Spanish rider hian hliam na tak a neih hnuah ngai a awh leh thei mai lo a, season thum chhung vel chu a talbuai. Tun hnaiah erawh hma rawn sawn leh tawhin, intlansiak hnuhnung pahnihah hnehna a chang.

Kum 31 mi Marquez chuan, "Tun hnaiah zawimuangin hma kan sawn, a bik takin Red Bull Ring aṭang khan hmasawnna chu a taka hmuh theihin a awm. Chutihrualin kan hmasawn dan hi a la tawk mai dawn lo.

"Kan elpui team dang hi an tlan chakin an ṭha em em a, anni elphak tur chuan keini pawhin nitin hma kan sawn a ngai, thawhhona ṭha nen chuan tun kar tawpah pawh beiseina sang tak kan nei leh thei ang," tiin a sawi.

Marquez tan champion beiseina a sang tawh lo, chutihrualin intlansiak hmabak pasarih an la nei a, a chunga awm Jorge Martín (Prima Pramac/Ducati) leh Francesco Bagnaia (Ducati) te chu chesual thei an ni ve tho, hei vang hian Marquez tan beisei bo vek a la ni bik lo.

Bike intlansiakna sang leh ngaihhlut ber hi tunkar tawpah an tlan leh dawn. Pathianni tlai hian Gran Premio Pramac dell’Emilia-Romagna an tlan leh dawn a ni.