Champion lai City mualah Champion tum Arsenal

Premier League champion lai Manchester City chuan anmahni eltu, champion tum Arsenal chu Pathianni zan dar 9:00 hian an lo mikhual dawn - season tir chauh la ni mah se, nomawi chawi leh chawi loh kawng thui tak hril thei tur a ni ang.

Pep Guardiola-a'n tun hnai season hnih chhung chu amah el buai phak a nei, a hming chu Mikel Arteta a ni. Man City tana assistant coach hna thawk tawh ṭhintu hian Etihad Stadium aṭanga point hlawh chhuah ngei a tum dawn a ni.

Midfield inbeihna

Man City leh Arsenal te midfied chungchanga an inbeihna hi khelmual pawn aṭangin a inṭanna a rei tawh hle. Declan Rice lak tumin an inchuh a, Rice leina tur atana pawisa hmang huai zawk Arsenal-in an chang.

English midfielder Rice an neih chinah Arsenal inkhel a nghet sawt a, season hmasa khan Man City nen league match vawi hnih an khelhah an tlawm miah lo, vawi khat chakin ṭum khat dang chu an inhnehtawk, goal an chhuah lo!

Rice hian hrem vangin league match hnuhnung a khel thei lo - Champions League erawh a khel leh tawh a, tun ṭumah pawh Arsenal inkhel khaikhawmtu a nih leh a rinawm - Martin Odegaard a inhliam vangin Jorginho emaw Thomas Partey emaw nen an dingdun ang.

Man City pawhin an neih ṭhat Kevin de Bruyne chu hliam vangin an chhawr thei dawn bik lo. Rodri hmaah tunge ding dawn sawi lawk a harsa, tawnhriat nei ṭha Ilkay Gundogan leh Mateo Kovacic te an la nei a, ball thiam Bernardo Silva a la awm cheu bawk.

Guardiola-a'n a naute hi leiah rang tak taka ball inpek kual tirin an khingpui an nawr leh ang a, ball pawh an chan tam leh a rinawm. Tottenham laka mahni inven hmasak pawi ti lo Arsenal hian counter attack hmanga vuak let an tum leh thung ang.

Haaland vs Saliba

Premier League season kal laia goal khung thei ber chu Manchester City (11 goals) an ni a, goal chhuah tlem ber chu Arsenal (1 goal) an ni thung. Match li aṭanga goal kua khung thei Erling Haaland chu Gabriel leh William Saliba ten lo dan an tum dawn.

City manager Guardiola chuan, "Arsenal hian goal an venghim ṭha em em a, an khingpuite hi goal khung theihna remchang pawh an pe ngai meuh lo. Inkhel hi an duh angin an thunun thei ṭhin," tiin an khingpui tur a fak, a rilru tak tak erawh a sawi kher lo mai thei.

Season hmasa an intawn pahnihah Arsenal tlarhnungten Haaland an dahṭha thei a, inrintawkna an nei sang leh ang. Chutihrualin, tun season bul a ṭan dan thlir chuan Haaland hi zuam chi a ni dawn lo, leiah leh boruakah minute khat lek pawh ven loha dah chi a ni lo ang.

Saliba leh Gabriel te an inkawp nghet, a sirah Ben White a rintlak bawk - Jurrien Timber chu hmuhnawm khawpin a khel ṭhin a, awmnem Oleksandr Zinchenko leh damkawr Riccardo Calafiori te aia thlan zawk a nih a rinawm.

Arsenal defender Saliba chuan, "Man City hi hneh ngei kan duh, kan tum bawk. Chutihrualin, anni hi hneh ila team dang lakah chesual leh si ila awmzia a awm lo, chuvangin inkhel zawng zawng a pawimawh vek," a ti a, inkhel dang pawh an ngai pawimawh vek tih a sawi tel bawk.