Chhanhimtu David Raya

Atalanta mualah Arsenal chu mualpho thei dihmunah an ding a, goalkeeper ṭha David Raya chuan North London club hi a chhanhim hram, 0-0 a inhnehtawkin Italy ram aṭangin Champions League point khat nen Gunners an kir.

Ningani zan Gewiss Stadium, Bergamo-a inkhelah Thomas Partey chuan Ederson a tih tluk avangin penalty a chawi a, a pet turin Mateo Retegui a lo ding chhuak a, goalkeeper tana dan harsa tur tawkin lei hrul lam hnaih sirah a pet.

Retegui hian a pet chhe lo, mahse keeper Raya chuan a lo zuan fuh tlat. Italian midfielder Retegui hian ball per hi a pet lohna lamah a tauh zui nghal a, amaherawhchu Raya chu rang zeta insiamṭhain a zuan leh hman tho, a zawnin an lama lut tur a dansak.

Arsenal manager Mikel Arteta chuan, "Football ka en tam ve tawh hle a, tun ṭuma mi kha save ka hmuh ṭhat berte zinga mi a ni hial ang. Season hmasa khan kan tan mi pawimawh a ni tawh, tun season phei chu a ni lehzual," tiin a keeper khelh danah a lungawi.

Season hmasa khan Arsenal hian Brentford aṭangin Raya hi loan hmangin an hawh a, an keeper neihsa Aaron Ramsdale aiin an ring zawk. Premier League Golden Glove a dawng hial a, nipui lai khan lei nghetin tunah chuan midang tan a hmun chuhpui ngam chi a ni rih lo.

Pathianni zana Manchester City nen an inkhelh hunah pawh Raya hi Gunners innghahna a ni leh dawn, tun season EPL match li aṭanga goal khat chauh la chhuahtu a nih avangin Erling Haaland nen an inhmachhawn tur hi a hmuhnawm ang.