NBA Finals khel tur Los Angeles Lakers

LeBron James awmna Los Angeles Lakers chuan tun hnai season 10 chhunga a vawi khat nan NBA Finals an khel dawn. Lakers hian nimin zing khan Denver Nuggets chu 117-107 a hnehin series 4-1 in an la.

Western Conference Finals game 5-a an chak avangin Lakers hi conference champion an ni a, regular season-ah khan a chung berah an awm bawk avangin NBA Finals luh hi an phu hle.

Tukin khan Boston Celtics leh Miami Heat ten Eastern Conference Final game 6 an khel a, result kan hre hman lo. Game 5 thleng chuan Heat lamin 3-2 in hma an hruai mek, a chak zawk hian Lakers nen basketball thiam ber nih an inchuh ang.

LeBron James-a'n Lakers a pan tirh khan sawiselna a tam, basketball aiin film leh sumdawnna lam vanga LA pan nia sawi a tam. Mahse, James-a'n infiamna a ngaih pawimawh thu leh, hlawhtlin a duh vang a nih thu a sawi thung.

Season hnihna a liam dawn meuh chuan James thusawi dikzia a lang ta. Inkhel pawimawhah American star hian 38 points, 16 rebounds leh 10 assists nei chungin a team a chakpui a, a vawi 10 nan NBA Finals a khel dawn.

Lakers coach Frank Vogel chuan, "Team beidawng ve ngai lo kan khel a ni a, inkhel hmuhnawm leh chhinchhinah tlak tak mai a hmuna ka en ve thei hi ka lawm," a ti. James bakah point 27 neitu Anthony Davis te an ṭangkai thu a sawi bawk.

Los Angeles Lakers-in NBA Finals an khelh hnuhnung ber chu season 10 liam ta daih tawh kha a ni, an thiampuipa Kobe Bryant hoa Boston Celtics hnehin nomawi an chawi, kuminah hian James hoin thawnthu hlui tih thar leh theihna kawng a in hawng.

Lakers legend Bryant hi kumin January thla khan helicopter chesualah a thi a, amah hriatreng nan leh a sulhnu thar thawh leh nan Lakers hian champion an duhna a sang hle - James pawhin Bryant tana nomawi chawi a duh.

James chuan, "Hnehna kan chan avangin kan lawm tur a ni a, hlim taka awm hun a ni. Amaherawhchu kan hmabakah hian hna thawh tur hautak zawk a la awm tih kan hriat a pawimawh. Lakers-in an ropuina an neih let hun ka tawng ve thei hi ka vannei," a ti.