Bayern-in Super Cup nomawi an chawi

Champions League champion Bayern Munich chuan Ningani zan khan Europa League champion Sevilla 2-1 a hnehin UEFA Super Cup nomawi an chawi.

Puskás Aréna, Hungary-ah Sevilla-in Lucas Ocampos penalty hmangin minute 13-naah hma an hruai a, Leon Goretzka hmangin Bayern-in minute 34-naah an sut. Minute 90 chhungin chak zawk an awm lo a, extra time-ah Javi Martinez-a'n chakna goal a tauh lut.

Sevilla-in Europa League nomawi chawi turin Manchester United leh Inter Milan an hneh a, heti chung hian Bayern Munich nena khaikhin ralah chuan an buk a zâng hle.Super Cup-ah erawh Spanish club hian khawvel rawn barakhaihin Bayern an chai thei hle. Barcelona aṭanga an laklet Ivan Rakitic-a'n Bayern defender David Alaba lak aṭangin penalty a hlawh chhuak a, Ocampos-a'n goal hmahruai a khung.  Minute 35-naa Luuk de Jong-a goal khung erawh offside vangin pawm a ni lo.

Sevilla hian goal an khung hmasa a ni satliah lo a, kumin chhunga hneh loh la tawng lo Bayern tan harsatna an siam. Julen Lopetegui-a'n awmze neiin player a rem a, Bavarians winger pahnih Serge Gnabry leh Leroy Sane te an dah ṭha tiin a sawi theih.

Minute 87-naah substitute Youssef El-Nesyri-a'n chakna goal khung theihna hun ṭha a nei a, amaherawhchu Bayern keeper Manuel Neuer-a'n a dansak. Spanish club vanneih zan ni se chak thei an ni a, chutihrualin Bavarians chet ṭhat vanglai an tawn avangin Super Cup nomawi an en liam a ṭul thung.

Bayern Munich-in Champions League nomawi an chawi theih nan Alphonso Davies hming a langsar a, left back-a khel ṭhin David Alaba chu centre back-ah chhawr a nih thu pawh mi nawlpui hriat a ni. Amaherawhchu mi tam takin an theihnghilh chu nikum nipui transfer-ah pound maktaduai 80-in Lucas Hernandez an lalut a, Bayern player manto ber hi left back a ni.

Hansi Flick-a'n Hernandez tih loh chu inkhel bul ṭantu zingah a rin ṭhin te bawk a ring a, ṭum dang ang bawkin an khel pawh a hmuhnawm. Minute 34-naa Bavarians siphurh sutna goal ngat phei chu a class a sang hle. Muller-a'n fing lutukin box chhungah a vawrh lut a, Lewy-a'n rem hre takin midfield tan pe letin Goretzka-a'n mawi zetin a tawp a rawn khar.

Bayern an chungnung zawk a, second half-ah Lewandowski leh Sane te goal khung offside leh foul vangin pawm a ni lo. German club tan Lewy, Muller, Kimmich leh Benjamin Pavard te an rintlak a, amaherawhchu a tawp an khar thei bik lo.

Extra time-ah Alaba ball pet chu keeper Bono-a'n nam per na tawk loin Javi Martinez-a'n fing zetin goal sirah a tauh lut. Spanish midfielder hi German club-ah hmun pawimawh a chang ta meuh lo a, a chawrchhuahna Athletic Bilbao lama let tura sawi a ni. Martinez hi an rama a let ta a nih pawhin Bavarians chuan UEFA Super Cup-a chakna goal a tauh luh leh club tana a hnathawh avangtein zahna chibai an buk a ṭul ang.

Puskas Arena-ah hian entu 67,000 an leng a, Super Cup-ah hian inkhel entu 15,180 an awm a, inkhel a hmuhnawm phah hle.

A hmuna entu leh TV kaltlanga entuten an hmuh chu Hansi Flick-a hote an thiam tih hi a ni a, German manager hnuaiah hian Bayern-in match 38 khel tawhin vawi 35 an chak a, goal 126 khungin nomawi pali an chawi. 

Thla 11 lek chhunga Flick-a hnathawh hi a ropui hle. German manager chuan, "Kan inhnehtawk a, chak erawh kan phu. Bundesliga lamah Schalke 8-0 in kan hneh tawh a ni thei, amaherawhchu kan nih dan tur kan la pha lo a ni," tiin insiamṭhat an mamawh thu a sawi.