Spurs an chak, an 'bye' bawk

Tottenham Hotspur chuan Ningani zan khan Europa League third qualifying round-ah KF Shkendija 3-1 in an hneh a, playoff round an lut. Spurs tan hian Erik Lamela (5'), Son Heung-min (70') leh Harry Kane (79') ten goal an khung a, Macedonia club hian minute 55-naah Valmir Nafiu hmanga an khung ve bawk avangin English club hi nuam sa takin an chak lo.

Inkhela an sawi zui ber erawh Telekom Arena-a an goal dah a ni a, inkhelh hmain Jose Mourinho-a'n a te hreta a ngaih avangin an zualko a, a san zawng leh a zau zawngah 5 cm-in a te ve ve. Mourinho chuan, "Ka goalkeeper-te'n goal a tet thu min hrilh a, keipawh keeper ni lo mah ila, naupan lai aṭanga goal zauh zawng hre tawh ka nih avangin ka phar khan a dik lo tih ka hre nghal," tiin a sawi.

Inkhelh hmain goal hi siam ṭhat a ni a, chutihrualin KF Shkendija erawhin tihsual an neih loh thu an sawi thung. Shkendija khelmual hian UEFA dan a zawm phak loh avangin inkhelhna hmun hi an stadium a ni lo. Spurs hian playoff-ah Maccabi Haifa an hmachhawn ang.

League Cup lamah Spurs hi bye hmangin chaka puan an ni bawk. London club leh Leyton Orient inkhel tur chu League Two club player engemaw zat Covid-19 positive avangin ṭhulh a ni a, nimin khan Spurs hi chaka puan an ni. Tottenham hian League Cup fourth round-ah Chelsea an hmachhawn dawn a, Mourinho leh a club hlui Blues inkhel tur hi a hmuhnawm ang. Spurs hian Pathianni zan dar 6:30-ah Newcastle United an mikhual dawn.