Mizoram Super League Zarkawt BCA-in final an lut

Samsung 3:16 Plan Solution Mizoram Super League-ah final-a in tum tur a chiang ta. Zirtawpni tlai khan Zarkawt BCA chuan Mission Veng Vikings chu 67-70 a hnehin MSL final-a Khatla TBL hmachhawn turin an inhlangkai.

Inkhel hnuhnung zawk zan lama inkhelah Tuikual South an chak lo a, Zarkawt Serpents-in 64-54 in an hneh a ni.

Zarkawt an duai lo

Hawla Indoor Stadium-ah Zarkawt BCA-in final lut turin vawi khat chak an tan a tawk tih an hria a, an game pawh a ṭang hle.

Zarkawt BCA tan Dennis Lalmuan­puia a che ṭha a, a team tan point 12 zet rawn score-in rebound 17 a la thei bawk. BCA tan Ramthar tlangval Zorinsanga'n point 13 score-in rebound vawi nga zet a la bawk.

Mission Veng Vikings tan Lalrina Renthlei rawn let leh tawhin a team tan a thawh hlawk lehpek hle. Point 11 rawn score-in rebound 8 a la a, a team a chakpui zo ta chuang lo.

BCA-in match khat khelh hmabak la nei chungin final an lut a, anmahni ang thoa final lut chiang tawh Khatla TBL nena Mizoram Super League champion hmasa ber nih an inchuh hun tur hi basketball ngaina tute nghahhlelh ber a ni ta.

Serpents-in Tuikual South an chuk

Zirtawpni zan inkhelah Zarkawt Serpents-in Tuikual South chu 64-54 in an hneh. Zan inkhel ṭan a nih hma hian Zarkawt BCA-in Mission Veng an hneh avangin Tuikual South tan final luh beiseina a bo tawh a, an game-in a tawrh phah a, tunhnaia an game an pha lo hle.

Zarkawt Serpents lamah player khel ṭha fal an awm lo a, an intluk tlang hle. An team work an chakpui a ni. Tuikual South tan player dang khel ṭha tawk lo mah se captain F.Zodinthara erawh a dan pangaiin a rawn khel ṭha leh hle. Tuikual South player tawnhriat nei ṭha hian a team tan point 20 a score bakah rebound 13 zet a rawn la thei a, a naute tan entawn tur a rawn hnutchhiah ṭha hle.

Serpents an chak avangin table mawngphahah Chaltlang Ryders an awm chiang tawh a, Ryders hian an match hnuhnung bera Mission Veng Vikings an hneh a nih pawhin parukna dinhmun hi an chhuahsan thei tawh lo.

TEAM DINHMUN

# Team Pld W L Pts G.Avg

1 Khatla TBL 9 9 0 18 1.17

2 Zarkawt BCA 9 7 2 16 1.1

3 Tuikual South BC 9 4 5 13 0.996

4 Mission Veng Vikings 9 3 6 12 0.96

5 Zarkawt Serpents 9 3 6 12 0.95

6 Chaltlang Ryders 9 1 8 10 0.87