La Liga Champion tum team pahnih inum boruak a sang
Inrinni zan Spanish La Liga inkhelah hmaruaitu Barcelona chuan palina Valencia chu 2-0 a hnehin hma an hruai chhun zawm a, pahnihna Real Madrid pawhin an khelmualah Malaga chu 3-1 a hnehin Barca an um ve zel.
A bul leh a tawpah Barca
Camp Nou-a inkhelah hian mualneitu Barca lamin inkhel ṭan rualin goal an khung nghal a, minute khatna lekah Lionel Messi ball siamsak chu Luis Suarez chuan Valencia goal-ah a thun nghal. Valencia an inring hman lo, an hawi hai hle. Mahse, Valencia an zam bik lo. An nawr let ve nghal a, striker Rodrigo hmangin chhan let na hun nei nghal mah se teuh takin goal sirah a pet hlauh.
Minute 10 pawh an khelh tlin hmain Valencia lamin penalty an hlawhchhuak. Barca defender Gerard Pique chuan Rodrigo a tihtluk avnagin penalty a chawi. A pet turin midfielder Daniel Parejo a rawn dingchhuak a mah se Claudio Bravo-a'n a lo dang hlauh.
Minute 90 an khel tling dawn tawh tihin Barca in Valencia tlar hnung an nawr tawm a, Neymar-a chuan Messi tan ball ṭha takin a pe. Messi ball pet hi Diego Alves-a'n a lo dan sak. Hun a la tawp lo, Messi bawk kan hmu nawn leh a, ke veilam hmang ngeiin mawi takin Barca goal hnihna a thun zui leh. Goal dang luhna hun a awm tawh lo, hun a tawp zui nghal.
Argentina captain hian tun season-ah a club tan inelna hrang hrangah goal 46 a khung leh der tawh a, Barcelona tan goal 400 zet a khung tling ta chiah bawk a ni.
Real ropuina Ronaldo
Inkhel an ṭan chauh, minute ngana lekah a khawvel a player manto ber Gareth Bale chu chawn hliam vangin lakchhuah nghal a ngai, a thlak turin Manchester United striker hlui Javier Hernandez dah luh a ni. Minute 24 naah Real-in free-kick an hmu a, a pet turin Cristiano Ronaldo a rawn ding chhuak. Ronaldo free kick hi defender Sergio Ramos chuan goal-ah a chantir.
Second half-ah Ronaldo bawk a langsar chhunzawm zel, minute 69-na a James Rodriguez goal khung theih nan a thawhhlawk leh hle. Rodriguez hian box pawn aṭangin mawi takin Real goal hnihna a thlawh lut. Real fans lawm authawm a reh hman lo, minute 71-naah Malaga defender Roberto Rosales cross ball chu forward Juanmi-a'n a tauh goal, 2-1 a ni chiah.
Real-in an duhtawk mai lo, a ṭhiante goal khung tur vawihnih siamsak tawh tu Ronaldo chuan goal a khung ve leh. He goal hi chu Bale aia lut Hernandez a siamsak a ni ve thung. Ronaldo-a'n ala duhtawk mai lo, angle zim tak aṭangin Malaga goal-ah a pet leh a, mah se goal ban sirah a kal hlauh.
Kum 30-a upa Ronaldo hian Real Madrid tan inelna hrang hrangah tun season-ah goal 50 zet a khung tawh a, tun hnai season nga chhungin goal 50 a thun tling thei vek a ni.
Inkhel dangah table a pathumna Atletico Madrid chuan khualmualah Deportivo La Coruna chu 2-1 in an hneh bawk. Atletico tan hian French forward Antoine Griezmann chuan goal hnih a khung a, mualneitu tan striker Oriel Riera chuan goal khat a khung ve bawk. Griezmann hian a season khatnaah a club tan goal 20 a khung tling der tawh a ni.
Tun dinhmunah Real hian League match 32 khelh tawh aṭangin point 76 hmuin pahnihna an ni mek a, an chungah hian Barcelona awmin point hnihin an inthlau mek. Inkhelh hmabak match ruk ala awm avangin champion tur a inum boruak a sang chho zel.
La Liga Inkhel results
Barcelona 2 - 0 Valencia
Real Madrid 3 - 1 Malaga
Deportivo 1 - 2 Atl Madrid
Ath Bilbao 4 - 0 Getafe
Levante 2 - 2 Espanyol