I League Review Wahingdoh-in hmahruaitu Mohun Bagan an hneh
Kolkata club Mohun Bagan-in tun season-a a vawi khatna atan I League-ah hneh loh an tawng a, an ngam loh chu Royal Wahingdoh an ni.
Inrinni zan khan Nehru Stadium, Guwahati-ah Mohun Bagan-in ṭum hnih ngawt hma hruai mah se Royal Wahingdoh-in ṭum hnih an sut hnuah chakna goal an khung zui a, 3-2 in an chak.
Minute 8-na lekah Balwant Singh hmangin Bagan-in hma an hruai nghal a, Wahingdoh-in darkar khat hnuah Jackichand Singh hmangin an sut. Minute 80-naah Haiti forward Sony Norde-a'n Bagan tan a khung leh a, chak turin lang hman mah se Lalchhawnkima leh Lalhmangsanga te khelhna Wahingdoh-in Trinidad and Tobago midfielder Densill Theobald hmangin minute 86-naah an sut a, Bagan tana goal hmahruai khungtu Balwant Singh-a hnawhchhuah a nih hnuah injury time-ah Thockchom Sing-ah chakna goal a khung.
Wahingdoh hi table-ah pahnihnaah an insawn chho a, Jeje Lalpekhlua khelhna Mohun Bagan erawh hmahruaitu an ni chhunzawm zel.
Inkhel dangah East Bengal leh Mumbai FC te 1-1 in an inhnehtawk a, Salt Lake Stadium-ah Mumbai FC-in minute 33-naa Brazilian forward Josimar penalty hmanga an hmahruaina chu East Bengal-in minute 56-naa Dudu Omagbemi goal hmangin an sut. Nigerian forward Dudu-a goal hi Robert Lalthlamuana freekick aṭanga lut a ni a, second half-ah S. Malsawmtluanga a in lan bawk.
Margao-ah Mizo tlangval F. Lalrempuia'n Pune FC tan goal a khung a, Lunglei tlangval goal khung hma hian mikhual team tan Darko Nikac-a'n goal a khung tawh bawk. Dempo-in Tolgay Ozbey hmangin goal khat rawn sut mah se Pune FC 2-1 in an chak ta tho. Rempuia hi hero of the match a thlan a ni.