Bundesliga Hmahruaitu Bayern Munich an tho nghal
Inrinni zan khan German Bundesliga hmahruaitu Bayern Munich chuan table a pasarihna Hoffenheim chu 2-0 in an hneh. Champions League a Porto an hneh loh hnua an inkhelh hmasak bera hnehna an chang leh nghal hi Pep Guardiola tan a lawmawm hle ang.
Bayern midfielder Sebastian Rode goal khat thun leh Hoffenheim defender Andreas Beck-a'n an lama a tih luh palh hmangin Bayern an chak a, table-ah point 13 zetin hma an hruai fal tawh a ni.
Inkhel chu
An tih ṭhin dan pangngaiin Bayern in ball an chang tam a, TSG 1899 Hoffenheim khelmual Rhein-Neckar Arena-a inkhel entu mipui 30,150 hmaah pawh 70% zet ball an chang leh a ni.
An inkhelh hnuhnung berah goal khat chauh an thun avangin Guardiola-a'n tlarhma lam a ngaipawimawh tih a hriat, hmatawngah Robert Lewandowski dahin a hnungah Mario Gotze leh Thomas Muller te a dah. Arjen Robben leh Franck Ribery te chhawr thei lo mah se an mamawh tawk goal erawh an khung thei.
Midfielder Rode chuan minute 38-naah box chhung aṭangin chiang zet zawtin an hmahruaina goal a thun, he goal hi Lewandowski siamsak a ni. Lewandowski a hlauhawm a, minute 48-ah goal bar pet per dawp in Hoffenheim tlarhnung a chhaih buai hneh hle.
Hoffenheim lamin an siphurh sutna hun ṭha an hmu a,winger Kevin Volland chuan box pawn aṭangin ṭha takin a pet a, mah se Bayern goal chung lam sirah a kal hlauh. Hun tawp hma chiahin defender Beck chuan anmahni lamah a ti goal palh a, Hoffenheim beiseina neih chhun a tawp zui nghal.
Dortmund pawh an chak e
Borussia Dortmund chuan an manager Jurgen Klopp-a'n a chhuahsan dawn tih a puan hnua an game hmasa berah khualmualah Paderborn chu 3-0 in an va hneh. Henrikh Mkhitaryan, Pierre-Emerick Aubameyang leh Shinji Kagawa ten goal khat ṭheuh an khung a ni. Dortmund hian point 36 hmu tawhin pariatnaah an awm mek. Season thara Europe a inlan turin beiseina an la nei ve zel a ni.
Bundesliga inkHel results
Hoffenheim 0 - 2 Bayern Munich
Bayer Levkn 4 - 0 Hannover 96
Bor Dortmund 3 - 0 SC Paderborn 07
Hertha BSC 0 - 0 FC Koln
Freiburg 2 - 3 FSV Mainz 05
FC Augsburg 2 - 1 VfB Stuttgart
Frankfurt 0 - 0 Borussia M'gladbach