Delhi Daredevils an chak leh ta

India Premier League an khel ṭha tluang zel a, Inrinni khan inkhel pahnih awmin inkhel hmasa zawkah Delhi Daredevils chuan Sunri­sers Hyderabad chu run li a hneh hramin a zawnin vawi hnih an chak ta. Inkhel hnuhnung zawkah Kolkata Knight Riders chuan Kings XI Punjab chu wicket liin an hneh bawk.

Inrinni tlai inkhelah bat hmasa zawkah Delhi an ṭang a, over 20-ah run 167 vawchhuakin wicket pali an hloh. Ball 41-a hmachhawna run 54 vawchhuaktu captain JP Duminy leh ball 40 a hmachhawna run 60 vawchhuaktu Shreyas Iyer te an khel ṭha hle.

Hyderabad-in an target theihtawp chhuah­in um mah se Delhi captain JP Duminy bawk an ngam lo a, South Africa batsman part-time bowler hian wicket li lai rawn la in Hyderabad batsman-te an hawihai. Over 20-ah run 163 chiah tlinin Hyderabad hi an out fai vek a ni.

Kolkata pawh an chak e

Inrinni zan inkhelah Maharashtra Cricket Asso­ciation Cricket Sta­dium, Pune-ah Kolkata Knight Riders chuan Kings XI Punjab chu wicket liin an hneh.

Punjab lam hian over 20-ah wicket pakua hlohin run 155 an vawchhuak a, ball 45-a run 60 vawchhuaktu captain George Bailey chu Punjab tana che ṭha awmchhun a ni.

Kolkata batsman-te che ṭha lo mah se a tawpah all rounder Andre Russell a rawn lang a, ball 36 a hmachhawnah run 66 rawn vawchhuakin a team a rawn chakpui a ni. Punjab tan Sandeep Sharma chuan wicket li lai rawn la mah se a team a chhanhim zo lo.

Vawiin inkhel tur

Zanin dar 8:00 hian Delhi Daredevils leh Kolkata Knight Riders te an inkhel dawn a, an inkhelhna hmun tur hi Delhi khelmual Feroz Shah Kotla-ah a ni.