Juve-in nomawi an hnaih

Italian Serie A hmaruaitu Juventus chuan an mahni hnaihber tu Lazio chu Inrinni zan khan 2-0 in an hneh a, table-ah point 15 a hma hruai fal tawhin champion nomawi an chawi teuh tawh hle.

Massimo Allegri naute'n inringtawk takin inkhel bul an ṭan a, Argentina striker Carlos Tevez chuan minute 17-na lekah a ke veilam hmangin an hmahruaina goal a chhuih lut. Tevez hian tun season-ah a club tan goal 18 a khung tling chiah.

Italy defender Leonardo Bonucci chun yard 18 a hla aṭangin kawh tak maiin an goal hnihna a thun leh a, minute 28-ah Juve-in 2-0 in hma an hruai der tawh. Lazio midfielder Danilo Cataldi chu minute 88-ah hnawhchhuah a ni a, an si phurh sut turin player 10 Lazio-in chakna an nei lo.

Inkhel dangah table-a pangana Sampdoria leh relagatin zone ami Cesena te chu goal lut loin an inhnehtawk a, point khat ve ve an insem.

Juve manager Massimiliano Allegri chuan, "Kan result-ah ka lawm hle mai, tunah chuan boruak nuam tak hnuaiah kan khel chhunzawm zel thei ang. Match thum emaw kan chak leh a nih chuan no mawi kan chawi thei tawh dawn a ni. Mahse kan helh hawlh tur a ni lo a, thil hi ala inthlak thut thei a ni tih hriain kan fim khur ala ngai reng tho," tiin a ṭawng fimkhur hle.