Karim Benzema goal nen Real an chak

Real Madrid chuan La Liga nomawi chawi thei tur team aṭangin thai bo chi an la ni lo tih an pholang a, an mikhual Athletic Bilbao chu 3-1 in an hneh.

Karim Benzema chu Real tan player langsar a ni a, French striker hian hun pawimawhah a team tan a par vul ṭhin tih pholangin goal hnih a khung.

Real tan Toni Kroos chuan goal hmahruai a khung a, Bilbao chuan Ander Capa tan an sut - mahse, Benzema inlarin goal hnih a rawn khung a, 3-1 in Zinedine Zidane-a naute an chak. 

Athletic Bilbao vanneih zan a ni lo a, attacking midfielder Raul Garcia chuan minute 13-na lekah a yellow card pahnihna a hmuh avangin hnawhchhuah a ni a, player tlem zawk nichungin hun tam zawk an khel. 

Madrid khelmualah goal aiin card kan hmu hma zawk a, minute 13-naah Raul Garcia chu hnawhchhuah a ni. Athletic Bilbao midfielder hi Toni Kroos laka a tackle avangin minute riatnaah yellow card pek a ni a, Kroos laka a foul nawn zui avangin minute 13-naah hnawhchhuah a ni. 

Mahse, beisei angin Real-in goal erawh an khung zui lawk lo. First half hun pek belhah Real fan-te rilru hlauthawng vai kiang turin Toni Kroos a inlar a, German midfielder hian penalty area pawn aṭangin a khung. 

First half-a tawp zui a, second half-a goal khung hmasa zawk erawh rin loh lam an ni - Ander Capa-a shot chu Real tan keeper Thibaut Courtois chuan dang zet mah se a per lehlam hi Capa ke bulah bawk a tla a, Spanish defender-in an si phurh a sut. 

Real-in inkhel an thunun zui a, hetihlai hian Athletic Bilbao-in an tha an thlah bik lo - minute 70-a pel tawh a, player tam zawka khel chungin Real-in point khat bak an hlawh chhuak dawn lo niin a lang hman. 

Champions League last 16 lut lo thei dinhmuna Real an din laia khai chhuaktu chu Benzema a ni a, La Liga champion an beiseina chhit nun saktu pawh Benzema bawk a ni. 

French striker hian point khat an hawn hmai dawn nia a lan hnuah Real goal hnihna a tauh lut a, hun pek belh minute hnihnaah chak nemnghehna a rawn khung leh bawk - Bilbao lamin Mikel Vesga hmangin Benzema goal hnih khung inkarah si phurh sutna hun ṭha an nei a, mahse, Courtois chuan ṭha zetin a dang. 

Benzema goal hmasa zawk hi Dani Carvajal siamsak a ni a, Spanish right back hian hliam vangin khelmual pawnah hun hmang ṭhin mah se a theihna a la ngai reng - Real tan tun season La Liga-ah match ruk lek la khel mah se assist vawi li a nei tawh. 

Kum 32 mi Benzema bawk hi fak a ṭul leh ṭhin - sawiselna tawk ṭhin mah se tun season inelna hrang hrangah Real tan match 16 khelin goal 10 a khung leh der tawh a, assist vawi thum a nei bawk. 

Real chak nan Benzema bawk a langsar a, Zidane pawh a lawm hle. French coach chuan, "Ka tan chuan France football chanchina striker ṭha ber a ni. Real Madrid-ah kum rei tak a khel tawh a, match 500 chuang a khel tawh hial. 

"Karim-a goal khung zat, nomawi chawi tawh leh hnathawhte hian striker ṭha a nih leh nih loh chu a hrilhfiah a ni. Ka tan chuan ani hi France striker awm tawh zinga ṭha ber a ni a, a chiang em em a ni," a ti. 

Benzema chuan, "Kan tan game pawimawh tak a ni a, kawng dik kan zawh zel a ni. Goal kan nawr ṭhat bakah tlarhnung pawh kan veng ho ṭha em em. Hetiang level-a kan awm chuan kan tana ṭha turin thil a her chhuak ṭhin a ni, " tiin a sawi. 

Real-in league match thum chhung a zawna hnehna an chan tak avangin table-ah pathumnaah an awm a, hmahruaitu Real Sociedad leh Atletico Madrid nen an point hmuh zat a inang - Atletico aiin match hnihin an khel tam a, Sociedad hian nizanah Barcelona inkhelhpuiin result kan hre hman lo.