Tevez chhuak mai dawn lo

Juventus striker Carlos Tevez chuan a club hlui Boca Juniors-a let leh mai a tum nia media lam tarlan chu thudik lo a nih thu sawi.

Argentine forward Tevez chuan, "Juventus-ah ka ngaihtuahna zawng zawng a awm a, chhuak tur ang a ka chungchang sawi tam lutuk hi thu dik lo a ni. Tuna kan hun tawn mek hi nuam thei ang bera hman ka duh a, ka chhuak dawn a nih chuan supporter hi a hre hmasa ber tur an ni," a ti.

Manchester khaw club pahnih tana khel tawh Tevez chuan sawi zuiin, "Team ṭha takah ka khel a, ka theihna ka lantir zel bawk. Tuna ka khelhnaah hian ka hlim a ni," tiin a sawi.

Tevez hian 2013 khan Man City aṭangin Juventus hi a zawm a, season khatnaah goal 21 a khung nghalin tun season-ah goal 27 a khung tawh bawk.

Juventus hi Serie A hmahruaitu an ni a, Coppa Italia leh UEFA Champions League-ah champion beiseina an la nei bawk.