Saints Champions League beiseina a thamral

Season hmasa khan beisei phak bakin Southampton an che ṭha a, Premier League-a an point hmuh san ber an hmu hial. Tun season ṭan dawnah an manager Mauricio Pochettino-a'n a chhuahsan a, Dutch manager Ronald Koeman an la lut. Ajax boss hlui hnuaiah hian beisei phak baka rawn che ṭhain Champions League khelh hial an sawi hman. Mahse, season a rei tawlh tawlh a, Saints pawh an zuih tial tial. Inrinni zan Premier League inkhelah Saints hian khualmualah Stoke City chu 1-2 in an hneh lo. Match nga chauh khelh hmabak a awm tawh avangin Champions League khelhna kawng a zim ta hle.

Britannia Stadium-a inkhelah Saints lamin hma takah hma an hruai a, Morgan Schneiderlin chuan minute 22-na lekah goal a khung. Mahse, second half-ah mual neitu Stoke City-in an theihna an pholang a, Manchester United striker hlui Mame Biram Diouf chuan minute 47 naah an si phurh sutna goal a rawn khung. Stoke City-in chak ngei an tum a, tunhnaia khel ṭha thei tak substitute Charlie Adam chuan minute 84 naah chiang zetin a volley goal ve lehin mualneitu Stoke City chu 2-1 in a chak zawkah an ṭang a, match li chhung a zawna an chak loh hnuah an chak ve ta.

Chak lo mah se Southampton manager Ronald Koeman chuan a naute khelh danah a lawm tho thu sawiin, "Kan vanduai ve bawk a ni. Ka naute an khel ṭha takzet a, minute 90 chhung inkhel thununtu zawk nichunga chak loh hi chu a rilru nat thlak ṭhin. Chance kan insiam hnem a, mah se goal kan khung thei tlat si lo. Mi zawng zawngin Champions League chungchang an sawi a, keini chuan kan sawi lo. Ṭha taka khelh chhoh zela Europe-a lan phak hi kan tum chu a ni mai," a ti.

West Brom beiseina a nung

Championship lama tla thei dinhmuna an din reng hnuin West Brom-in chak hmel an hmu ve leh ta a, match thum chhung a zawna an chak loh hnuin Crystal Palace chu an khelmualah 2-0 in an va tlawm. Point riatin tunah chuan 'bottom three' an tlanpel ta.

Selhurst Park-a inkhelah hian mikhual team-in goal an khung hma a, minute hnihna lekah James Morrison chuan Baggies tan a tauh goal. Goal dang erawh a luh belh lawk lo. Minute 53-naah Craig Gardner chuan yard 25 a hla aṭangin West Brom tan khung lehin a chak zawkah an ṭang ta a ni.

Alan Pardew-a'n a enkawl hnua che ṭha em em mai Crystal Palace tan match li chhung a zawna an chak hnua an chak lohna hmasa ber a ni. West Brom manager Tony Pulis hi Crystal Palace manager hlui a ni bawk.

Burnley tlak a hnai

Inrinni zan khan Goodison Park-ah tun season-a beisei phak lo Everton leh tlak hlau Burnley te an inkhel a, minute 29-naa Kevin Mirallas goal hmangin Everton hian 1-0 in hnehna an chang a ni.

Everton hian inkhel ṭan aṭanga minute 10-na lekah hmahruaina hun ṭha an nei zawk a, mah se Ross Barkley chuan Aaron Lennon penalty hlawhchhuah chu goal-ah a chan tir thei tlat lo. Penalty vawi 15 a peta vawi 14 pet goal tu Leighton Baines awm reng laia Barkley-a'n a pet teh tlat hi a mak angreng hle.

Burnley hi an vanduai hrim hrim a, first half-ah Ashley Barnes chu hnawhchhuah a ni a, kim lo chungin second half chhung zawng an khelh a ngaih phah a ni. Burnley hian khelh hmabak game nga chauh nei tawh chungin Premier League table mawngphah an la luah mek a, season tawpah Championship lama an tlak ngei a rinawm ta hle.

Beiseina thar nen Leicester

Leicester City-in season tawp lamah an beiseina an chhi nung thar a, an khelmualah Swansea City lo mikhualin tun season-a a vawi khatna atan match thum chhung an chak zawn ve ta.

Minute 15 naah Leonardo Ulloa chuan Leicester hmahruaina goal hi khungin minute 89-naah Andy King chuan an chak tihchian nan goal khat a rawn khung ve leh bawk a ni. Swansea tan match li an chak zawn hnua an chak lohna hmasa ber a ni.