FA Cup A zawnin Arsenal-in Final an lut
Arsenal chuan a vawi 19-na atan FA Cup final an lut a, anni aia final lut tam an awm lo. Inrinni zan khan Alexis Sanchez a goal hnih hmangin Arsenal chuan Reading 2-1 in an hneh a ni.
Arsenal hian FA Cup vawi 12-na chawi leh turin an dinhmun an siam ṭha tawh a, Pathianni zana Aston Villa leh Liverpool inkhela chak zawk zawk nen final hi an khel ang.
Arsenal-in final an luh theih nana goal hnih khungtu kum 26-a upa Sanchez hian nipui khan Barcelona aṭangin London club hi a pan a, tun season-ah a club tan inelna hrang hrangah goal 22 khung tawhin a ṭhiante goal khung tur vawi 10 a saimsak tawh bawk.
Inkhel chu
First half-ah Premier League club Arsenal-in inkhel an thunun hneh hle a, 74% lai ball an chang thei. Mahse, goal erawh an khung mai bik lo. Manchester United player hlui Danny Welbeck leh defender Per Mertesacker-a te'n Reading goalkeeper Adam Federici-a tan hna a siamsak nghal , mahse Federici a chesual duh bik lo.
Arsenal-in goal thun tumin an nawr reng a Welbeck-a free-kick hlawhchhuah chu Mesut Ozil-a'n a thun teuh hle, a vanneihni a ni lo, goal hrulah a kal hlauh. Inkhel thunun viau mah se Gunners lamin clear chance an insiam sak hleithei bik lo.
Goal lut loin first half a zo mai dawna a lan laiin Ozil chuan Sanchez tan through ball ṭha tak a pe a, ani hian a thiam zia lantirin mawi takin minute 39-naah Arsenal hmahruaina goal a khung. Goal dang lut tawh loin chawlhlawk an hmang.
Second half an ṭan chiah a Reading lamin an si phurh sut ngei an tum a ni tih a lang nghal. Minute 54-naah forward Pavel Pogrebnyak cross ball ṭha tak mai chu midfielder McCleary-a'n Arsenal goal-ah a lo pet. He ball lo kal hi David Ospina aia lut Wojciech Szczesny chuan thiam takin lo man mah se goal line a pel hman tih goal-line technology hmangin chiang takin a lang. Reading-in an siphurh an sut a, 1-1 chiah a ni.
Reading lam bawk an hlauhawm zui. Daniel Williams goal shot ṭha tak mai chu goal hrulhah a kal hlauh, Arsenal an vannei hle. Minute 70 an khel tling goal a luh belh thei mai lo, Ozil-a free-kick chu Gabriel Paulista chuan a tauh over leh hlauh. Welbeck aia rawn lut Olivier Giroud chuan chak na goal khung theihna hun ṭha hmu mah se Federici a sutalng zo bik lo. Minute 90-ah 1-1 a nih avangin extra time khelh a ni.
Arsenal tlarhmaah Ozil leh Sanchez te an langsar a, Reading tlarhnung an chaihbuai thei hle. Minute 106-naah khel ṭha tak Reading goalkeeper Federici a chelsual a, Ozil-a siamsak hmangin Sanchez chuan he inkhela a goal hnihna leh Arsenal hmahruaina goal a khung leh. Minute 120 an khelh tlin thleng pawhin Reading-in an si phurh an sut thei lo a, Gunnuers lam pawhin an thun belh thei bik lo.
Eng nge an sawi?
Arsenal boss Arsene Wenger chuan, "Inkhel harsa tak a ni. Reading khan an theihna zawng zawngin an khel a, an inpumpek tak meuh meuh avangin a harsa takzet a ni. A tawpah Federici a chetsual zarah kan vannei hlauh a ni," tiin an chak chu vanneih vang anih thu a sawi.
Reading manager Steve Clarke chuan, "Kan vanduai, zaninah khan goal-line technology ṭangkaina chu kan hmu chiang hle. Team ṭha tak kan hmachhawn a nih chuan vawikhat chetsual hi a pawi ṭhin a ni. Kan duhthusam ram thleng chiah lo mah ila ka naute ka chhuang tak zet a ni," tiin a sawi.