Premier League Chelsea khawih phakah champion nomawi
70% ball chang team-in an pet goal lo a, 30% ball chang zawkin an pet goal a, Chelsea-in Manchester United 1-0 in an hneh. Football-ah 'goal' a pawimawh!
Stamford Bridge-ah Jose Mourinho-a'n tlar hnung a rem phui thiam zia a lantir a, Premier League champion turin vawi ruk khelhah point kua hlawhchhuah a la ngai.Arsenal an hneh phei chuan inkhel dang pangaah vawi khat chak a tawk tawh ang.
Inrinni zanah Chelsea khingpui Man United-in ball chang tam zawk mah se Dutch manager Louis van Gaal-a game plan aiin Mourinho game plan a ding chang a, Eden Hazard-a goal chu London club point thum hlawhchhuahna a ni.
Dutch manager Van Gaal-a'n inhliam vanga Michael Carrick, Phil Jones, Marcos Rojo leh Daley Blind-te a chhawr theih loh avangin Carrick hmun ruakah Ander Herrera dah a ni a, captain Wayne Rooney chu midfield-ah pawh let a ni a, Radamel Falcao chu forward-ah awmin left back-ah Luke Shaw a inlan a, defence laia rawlthar Paddy McNair a ni.
United-in bul an ṭan fuh a, Rooney ball pet chu keeper David de Gea-a'n a goal emaw tiin a lawm hman hial. Chelsea-in chance an neih hmasak berah goal an khung a, minute 38-naa Oscar-a pass leh Hazard-a finishing tawih lutuk chu chakna goal atana mawi a ni. Dutch manager Van Gaal erawh goal luh hmaa Falcao-a ball hloh chhan kha foul ngeiah ngaiin fourth official Craig Pawson chungah a lungawi lohna a hri thla.
Second half-ah Didier Drogba thawhrah sengin Hazard-a'n goal hnihna a khung teuh hle. United-in Angel Di Maria leh Adnan Januzaj te an luhtir a, che fuh hleithei lo Falcao goal ban pet per bak chu chance hlauawm an nei lo a, penalty beiseia tlu Herrera erawh a chet dan hmu chiangtu referee Mike Dean-a'n yellow card a pe. Chelsea an ṭang tluan a, 1-0 in a chak.
Mourinho a ngaihnawm
Chelsea boss Mourinho-a'n ball chan aiin chak a ngai pawimawh. Man United-in 70% ball possession an neih kha pawi a ti lo. Mourinho chuan, "A harsa dawn tih chu kan hria a, kan rin ang em em erawh a ni lo. Kan game plan ang thlapin kan khel chhuak," a ti.
A game plan sawi zuiin Chelsea boss chuan, "Marouane Fellaini dah ṭhat te, winger ball cross theih loa siam te, Rooney midfield-a a awm dawn tih kan hriat avangin penalty area thleng pha lo tura siam te, freekick pet thiam pathum ngawt an neih avangin hnai taka freekick chawi loh bakah tihsual vela goal khungte chu kan tum a ni. An player ṭhate kha kan thamraltir a, kan thuhnuaiah kan dah a ni," a ti.
Chelsea hmachhawn hmaa Premier League-a vawi ruk chak thei United player pawimawh Juan Mata leh Fellaini-te ṭum dang angin an langsar lo a, Portuguese manager thusawi pawm harsa ti tan pawh a dikna hmuh hmaih thiang lo.
Kan khelh ṭhat ber ṭum - Van Gaal
Dutch manager Louis van Gaal chuan, "Thinrimna tur a awm lo. Kan khelh danah ka player-te ka chhuang hle. Tun season-a kan khelh ṭhat ber ṭum a ni a, mahse football-ah chuan khel ṭha zawk ni chungin a chak loh theih," a ti.
Van Gaal hnuaiah hma an sawn a, a ngaihdanin khelh ṭhat ber ṭum an tawn vawi lina a ni! October 21, 2004-a West Brom nena an indraw ṭumin, inkhelh banah tun season-a an inkhelh ṭhat ber ṭum a nih thu Dutch manager hian a sawi a. November 29-a Hull an hneh ṭumin an khelh ṭhat ber ṭum an tawng leh a, December 28-a Tottenham an draw ṭumin first half bik chu an chet ṭhat ber ṭumin niin Van Gaal hian a sawi leh bawk.
Stats thlirin Van Gaal a daw bik lo. United-in shots 15 an neih laiin Chelsea-in vawi 7 chauh an nei a, ball possession-ah pawh 70% an nei a, ball pass zat pawh a inthlau hle. Van Gaal-a naute vawi 665 zet an in pass laiin Mourinho naute vawi 284 chauh an in pass thung.