Brighton hmaah point la hmu lo Man United

Tun season Premier League-ah club pasarihin chak an la nei lo a, point la hmu lo zinga mi Manchester United chuan vawiin tlai dar 5:00 hian Brighton & Hove Albion hmachhawn turin Falmer Stadium an tlawh dawn. Seagulls-in match hmasa berah Chelsea hneh lo mah se Newcastle United 3-0 in an hneh leh tawh a, Crystal Palace hneh lotu Man United tan vanduai theihna an ni.

Man United manager Ole Gunnar Solskjaer chuan, "Kan intawn hnuhnun ber khan result ṭha kan nei a, kan thlen nawntir leh ngei kan beisei," tiin a sawi. Kumin January thla khan United-in Falmer Stadium luhchhuahin Mason Greenwood-a'n goal hnih a khung bakah player thar Bruno Fernandes-a'n a pet goal a, 3-0 in an chak.

Solskjaer hote hian League Cup-ah Luton Town 3-0 in an hneh a, an khelh dan lungawithlak lo mah se an result-ah lawmna tur a awm. Goal thum an khung bakah goal an chhuah lo a, chutihrualin player lut turah inhnialna tur a awm thung.

Palace laka goal thum chhuahtu David de Gea chuan, "Ka inringtawk em em a, kan tum chu nomawi chawi tura theihtawp chhuah a ni," tiin a sawi a, bul a ṭan leh mai a rinawm. Chutihrualin Luton Town laka goal chhuah lo Dean Henderson a lut a nih pawhin United ṭantute an hnual lo ang.

Seagulls nen hian Aaron Wan-Bissaka-a'n bul a ṭan chhunzawm a rinawm a, Harry Maguire a kawppui tur hi inhnialna tham a tling. Palace laka mualpho Victor Lindelof aiin Eric Bailly a lut a nih pawhin a mak lo ang. 

Midfield inrem dan tur hi United ṭantute hriat châk a ni a, Solskjaer chuan, "Bruno Fernandes, Paul Pogba leh Donny Van de Beek te hi vawi khata lut rual thei vek an ni a, chutihrualin Nemanja Matic, Scott Mc Tominay leh Fred te thlan theih an ni bawk," tiin a chhawr tur hriatthiam a la har hle.

Goal nawr turah erawh Luton laka goal khungtu Greenwood leh Rashford bakah Anthony Martial ten bul an ṭan a rinawm a, Manchester United-in inrintawkna nei let turin Seagulls an hneh a ṭul takzet.

Brighton & Hove Albion hi league match hmasa ber aṭangin an hmuhnawm nghal a, Chelsea nen pawh chak lo mah se game mawi an khel. Newcastle nen an inkhelh ṭuma hnawhchhuah midfielder Yves Bissouma an chhawr thei dawn lo a, inhliam sa Jose Izquierdo, Florin Andone leh Christian Walton te thlan theih an la ni lo bawk.

Player dang zawng an dam ṭha a, Liverpool player hlui Adam Lallana pawh a dam tihna a ni. Seagulls player zinga mit la ber erawh Tariq Lamptey a ni a, kumin January thlaa Chelsea aṭanga Brighton zawmtu hi right back-ah awmin league match hnih khelh tawhah player hmuhnawm ber zinga mi a ni.