Lazio an chak zo lo

Thawhlehni zan Serie A inkhelah Lazio chu Benevento nen 1-1 in an inhnehtawk. Simone Inzaghi naute hian beisei angin season bul an ṭan fuh lo a, match 11 an khelh tawh chinah an la tho chhuak thei meuh lo.

Municipal Stadium Ciro Vigorito a inkhelah mikhual Laizo tan Ciro Immobile chuan minute 25-naah goal hmahruai a khung a, chawlhlawk hma deuhin mualneitu lamin Pasquale Schiattarella hmangin an sut a, goal dang a luh belh tawh lo a ni.

Goal an neih an hum loh vangin coach Inzaghi a lawm lo. Italian manager chuan, "Ka naute khan an theihna zawng zawng an hlan, goal kan chhuah kha chu mak ka ti hran lo. A chhan chu ka khingpui kha team ṭha tak an ni miau a.

"Amaherawhchu, goal kan chhuah a nih pawhin khung belh ila a ziaawm ang. Chawlhlawk hma ngei pawhin hun ṭha dang kan nei leh a, mahse kan chhawr ṭangkai thei tlat lo kha a pawi lai chu a ni," tiin a sawi. Benevento hi Simone unau Filippo Inzaghi kaihhruai an ni ve thung.

Lazio keeper Pepe Reina pawhin point hnih an hloh thu sawiin, "Goal venghim ṭha ni ila chuan point thum kan hmu ang. Tlarhnung kan insiamṭhat a ngai hlein ka hria, a bik takin Champions League kan khelh leh hma ngeia insiam ṭhat a pawimawh," a ti.

Italian club hian nakkum February thlaah Champions League champion lai Bayern Munich an hmachhawn dawn. UCL hma hian Serie A match 12 ngawt khelh tur an la nei a, insiamṭhatna hun an la ngah hle.