Tuten nge MPL11 semifinal khel dawn?

LZ Juice MPL11-ah a sang paliin semifinal an khel dawn a, chhiarkawp dan ang thlapin Aizawl FC leh Chanmari FC ten semifinal an lut tawh. Table mawngphaha awm FC Bethlehem tan semifinal beiseina a tawp a, hmunruak pahnih hi Mizoram Police, Chawnpui, Sihphir Venghlun, SYS leh Ramhlun Athletic ten an inchuh ang.

Tunkarah MPL round hnih khelh a ni dawn a, league champion tur leh semifinal khel tur chu tunkarah an chinfel theih hial a rinawm. Vawiin inkhel tur hian nghawng lian tak a nei dawn.

Chhun dar 12:00-ah Aizawl FC leh Ramhlun Athletic FC te an inkhel ang a, tlai dar 3:00-ah SYS FC leh Mizoram Police FC te an inkhel thung ang. I League club hi league champion nih inbeisei an ni a, a dang pathum hi semifinal khelh thum vek an ni.

Beiseina la neite

Mizoram Police : MPL champion lai hian SYS bakah Chanmari leh Ramhlun Athletic te an la hmachhawn dawn a; Lunglei club laka phuba an lak theih a, Chanmari kim lo an hneh bawk chuan group match hnuhnung ber khelh hmain semifinal an lut chiang ang.

Chawnpui : Lalrindika Hmar enkawl team hi a sang pali zingah an awm tawh mah se an fixture hmabak avangin an dinhmun hi a la ṭha bik lo. Chawnpui hian Chanmari, SYS leh Aizawl FC an la hmachhawn dawn. Chutihrualin Chanmari kim lo an hmachhawn tur erawh malsawmna a ni thei ang.

Sihphir Venghlun : MPL club thar Sihphir Venghlun hi round 10 zawhah palinaah an awm mah se round 11-ah Police-in football an zirtir - rin san ngam an har tawh. Chutihrualin Sihphir Venghlun hian an khelh hmabak FC Bethlehem, Aizawl FC leh SYS FC aṭanga point ruk an hmuh theih chuan semifinal kawng a la inhawng thei a, tun round-ah table mawngphaha awm Bethlehem an hneh chuan phurna thar an nei leh thei ang.

SYS FC : Lunglei club SYS inbuatsaihna a ṭha a, an kum naupanna leh tawnhriat an neih tlemna a ang leh ṭhin. Lalmuankima hote an vanduai a, Chanmari kim an tum hman avangin match hnuhnung berah point an hlawhchhuak lo. SYS fixtures la hautak a; Mizoram Police, Chawnpui leh Sihphir Venghlun te an la hmachhawn dawn a, an elpui vek an ni.

Ramhlun Athletic : Danny Lalduhawma hoten match hnuhnung berah an elpui Chawnpui FC an hneh lo a, relegation zone-ah an awm hial. Chutihrualin Ramhlun hian palinaa awm Chawnpui an phak lohna chu point thum chauh a ni a, semifinal beisei ngam tur an la ni. Mahse, vawiin hian Ramhlunin league champion nih tum Aizawl FC an hmachhawn dawn a, hmabak a hautak dawn hle.

Goal khung thei ve ve

Vawiin chhun dar 12:00-a Aizawl FC leh Ramhlun Athletic inkhel tur hi en a châkawm tawh hle. I League club hian point an hloh a nih chuan an hnuaia awm Chanmariin an rawn lehpel nghal thei dawn.

Victor Lalbiakmawia hote hian Ramhlun Athletic hi hneh ngei an tum dawn a, an intum hmasak ṭumin 3-1 in an hneh tawh a, tun ṭumah chiang zawka hneh an tum ang.

I League club hi an insiamrem tawh a, an player neih tur angte an neih tawh bakah khelh dan nghet an nei chho tawh. AFC forward Lalbiakdika'n goal 11 a khung tawh a, MPL season khata goal khung tam ber record nihrual turin goal hnih chiah a mamawh tawh a, hattrick a siam phei chuan record thar a siam thei dawn.

Chutihrualin Ramhlun Athletic tan chetsual a thiang tawh lo a, vawiin hian thawhchhuah ngei a ṭul. An goal khung khawl Felix Lalruatsanga pawhin match li chhung goal a khung tawh loh avangin goal riatah a la tang a, top scorer ni tura inelnaah BD-a goal thum ngawtin a pha tawh lo. Serchhip tlangval hian Aizawl FC lakah insiamṭhat a tum ang.

Inkhel pawimawh bik

Tlai dar 3:00-ah Police leh SYS an inkhel dawn a, Lunglei club hian an inkhelh hmasak zawk ṭumin chhun pachangah 3-2 in an hneh. MPL champion lai tan SYS hneh loh hi mualphona a ni pha a, vawiina an chak loh nawn chuan mualpho nawnna a ni thei ang.

Police hi tun season-ah an khel a la nghet tawk lo a, MPL ṭantirh lamah che ṭha lo mah se I Day Football-ah an champion tho. Nomawi an chawi hnuah an chet ṭhat chhung a rei lo a, Bethlehem lakah an mualpho.

Table mawngphaha awm Bethlehem laka an chak loh avangin Police-in residential camp an neih phah hial a, an khelah hmasawnna hmuh tur a awm. Police inkhel a nun leh tak avangin SYS lakah pawh rinkai zawk an ni ang.

Chutihrualin SYS hi kum tluana training ṭha tawk an ni a, mahse team lian an tumin an kum naupanna a lan leh ṭhin. Tun ṭum inkhel tur danglamna erawh SYS hian chak ngei an mamawh a, Police hi an intum hmasak ṭuma an hneh bawk avangin inrintawkna nasa tak an nei ang.