Mittui nen Luis Suarez a liam ta

Luis Suarez-a'n a châk ber ṭhin chu Barcelona tana khelh phak a ni a, kum ruk zet chu a jersey ngaihsan em em ha chunga khelmual a mawi hnuin a jersey a hlip dawn ta. 

Kum 33 mi striker hian Atletico Madrid tan a khel tawh dawn a, Barca ṭantute tan chuan an hmelma kumhlun jersey ha chunga Suarez hmuh hi thil harsa tak a ni dawn. 

Suarez hian Ningani zan khan mittui nen Barca mangṭhana thu chu media hmaah a sawi a, Uruguayan striker chanchin ngah ve tak hian, "Barca chhuahsan tur hian ka inbuatsaih miah lo a, ka tan chuan thilmak a ni," tiin Nou Camp a mangṭha. 

Atletico Madrid hian Pathianni zan dar 7:30-ah league match khel turin Granada an mikhual dawn a, he thu buatsaih a nih lai hian Suarez inlan dawn leh dawn loh a la sawi theih loh. 

November 2014 khan Suarez hian a chanchin ziahna lehkhabu 'Crossing The Line - My Story' chu a tichhuak a, he lehkhabuah hian Barcelona tana khelh chu a mang ram a nih ṭhin thu a ziak. 

Suarez chuan, "Rawlthar mai ka la nih lai khan Sofi (tuna a nupui ni ta) tlawh turin chawlh laiin Barcelona ka rawn kal a, Nou Camp chhehvelah leng kualin hun kan hmang ṭhin.

"Stadium lut tura ticket lei turin pawisa kan nei lo a, club museum pawh kan tlawh thei lo. Mahse, ni khat chu gate an khar theihnghilh a, Sofi hlau chung chung chu ka luh rukpui a ni. Minute hnih vel kan awm a, thla ka la a, kan chhuak a ni," a ti!

Suarez hian Barca a zawm khan hemi chungchang hi a hunlaia club President hnenah a sawi chhuak a, contract ziak tura Barca a pan ṭuma a nupui Sofi a hruai chuan club director pakhatin, "Sofi, i lokal chu a ṭha hle mai. Kum 2004-a club stadium in tlawhna man in la pek loh kha pek a ngai a ni," tiin a lo fiam. 

Thawnthu ngaihnawm ber pawhin tawp hun a nei ṭhin a, kum 2014 a  Barcelona zawmtu Suarez pawhin thawnthu ngaihnawm tak a lo ziah tawh chu a tihtawp a hun ta. 

Suarez chuan, "He hmun ka lo pan khan ka tihsual tawh tam takin min hual vel a, mahse Barca khan ka chungah rinna an nghat tlat a ni. Heng zawng zawng lo pawm mai kha thil harsa a ni a, mahse coach leh ka khelhpuite khan lawm takin min lo pawm vek a ni. 

"Barcelona pan a, khawvela team ṭha ber tana khel tura ka thil hloh tam tak kha mi zawng zawngin an hria ang. Keini hun chu a liam ṭan ve ta a, mahse kan hnathawh erawh ka chhuang em em reng dawn a ni," a ti. 

Suarez hian Barcelona tana a khelh chhungin La Liga (4), Copa del Rey (4), Spanish Super Cup (2), Champions League (1), UEFA Super Cup (1) leh FIFA Club World Cup (1) nomawi a chawi hman. 

Suarez-a'n Barcelona tana a khelh chhungin inelna hrang hrangah goal 198 ngawt a khungsak a, Catalan club tana goal khung hnem lama a tluk loh awmchhun chu Cesar Rodriguez (232) leh Lionel Messi (634) chiah an ni. 

Ajax aṭanga khawvel hmel-hriat hlawhtu striker chuan, "Club-in an mamawh tawh lo thu che an hrilh che a nih chuan lawm taka pawm mai a ngai. Mahse, thil tam tak a ken tel tawh avangin lung dam taka pawm turin hun erawh a duh a ni," a ti. 

Suarez-a'n Barcelona a chhuahsan dawn tih a chian khan a club hlui Ajax leh Liverpool pawh sawi rik an ni a, Juventus pan mai tur anga a lan hnuah Atletico a pan leh ta zawk. 

Uruguay tan vawi 113 inlana goal 59 khung thei striker chuan, "Barca-in min mamawh tawh loh thu an sawi khan club hrang hrang aṭangin dawrna ka dawng a, Madrid leh Barcelona el phak team a la khel tur niin ka hria a, team ṭha tak ka zawm dawn a ni," tiin a sawi. 

Lionel Messi-a'n Barcelona chhuahsan a duh thu a sawi avangin Catalan club hian transfer bazar-ah thawm ring tak an nei hman a, Messi cham tur thu a chian hnuah Suarez-a chhuah tur thuin media titi a luah zui. 

Hetiang boruak karah hian Barcelona league match khel tur pawhin ngaihven a hlawh tawk meuh lo a, Catalan club hian tun season a an match hmasa ber ni turin Pathianni zan dar 12:30-ah Villarreal an mikhual ang.

Ronald Koeman enkawlna hnuaia Barca-in inelna an hmachhawn hmasak ber tur a ni a, Pathianni zana an result hi Dutch coach hnuaia indinthar tum mek Barca tan a pawimawh khawp ang. 

Hetihlai hian tun season La Liga a an match hmasa bera Real Sociedad inhnehtawkpuitu Real Madrid chu zanin dar 12:30 hian an inlan dawn bawk a, Real Betis chu khualmualah an lenchilh dawn.