Mumbai City an chefuh thei lo
Indian Super League-ah season liam taa league-a pakhatna Mumbai City an chefuh thei lo a, match hnih khelhah point khat chauh an la hlawh chhuak. September 21, Inrinni zan khan Mumbai City hi Jamshedpur lakah 2-3 in an tlawm.
ISL inkhel dangah Punjab-in Odisha 2-1 in an hneh a, Mohammedan SC leh FC Goa te 1-1 in an inhnehtawk. Nizan khan Kerala Blasters leh East Bengal te an inkhel a, result kan hre hman lo.
Khalid Jamil a che ṭha
JRD Tata Sports Complex-a inkhelah Mumbai tan Mizo pahnih captain Lallianzuala Chhangte leh Hmingthanmawia Ralte (Valpuia) ten bul an ṭan a, Jamshedpur lamah Mizo awmchhun C. Lalhriatpuia'n squad a chang lo. Chutihrualin Jamshedpur enkawltu hi I League-a Aizawl FC champion puitu Khalid Jamil a ni a, champion-na kawnga player pawimawh goalkeeper Albino Gomes leh right back Ashutosh Mehta ten bul an ṭan.
Mumbai-in khualmualah khel mah se inkhel bul an ṭan ṭha zawk a, goal chance pawh an ngah zawk. Minute 16-naah lekah Mumbai forward Nikos Karelis-a'n goal ropui a khung a, box pawn aṭangin kawh zetin a pet lut. Karelis hi Greek club ṭha Panathinaikos tana khel tawh a nih bakah Arsenal youth team tan pawha inlan tawh a ni.
Lianzuala leh Bipin Singh te pawhn chance an nei a, mahse hun an ṭha neih an hmang ṭangkai lo. Jamshedpur erawhin an hun ṭha neih an bawhpelh lo a; Jordan Murray-a'n ṭha zetin minute 36-naah a tauh lut.
Mualneitu tan Javi Hernandez a rawn lang a, minute 44-naah a hla tak aṭanga freekick pet chu tauh fuhtu awm lo mah se goal kilah a lut ta tho. Jamshedpur an khel ṭha zel a, second half-ah pawh bul an ṭan ṭha. Minute 50-naah Javi Hernandez-a'n box chhung aṭangin ṭha zetin a pet lut.
Mumbai City-in 3-1 a an hnufual hnuah an nawr na leh chauh a, Brandon Fernandez-a'n hnai tak aṭangin a hlah. Minute 77-naah Yoell van Nieff-a'n box pawn aṭangin goal ropui a khung a, Mumbai-in beiseina thar an nei. Hun tawp thlengin Mumbai-in an nawr mah se goal dang hmuh tur a awm tawh lo - match hnih khelhah chak hmel an la hmu lo.
Odisha chak lo
Zirtawpni zan inkhelah pawh Mizo tamna Odisha an chak lo. Jawaharlal Nehru Stadium, Delhi-a inkhelah Odisha-in bul ṭan chhe lo mah se inkhel pumpuia khel ṭha zawk mualneitu Punjab-in an phu angin hnehna an chang.
Odisha tan hian Isak Vanlalruatfela, K. Lalṭhathanga (Puitea) leh Jerry Lalrinzuala ten inkhel bul an ṭan a; bench aṭangin Jerry Mawihmingthanga leh Jeremy Zohminghlua te an lut.
Punjab hian minute 28-naah mawi zetin Odisha tlarhnung an ṭhiat a, Nihal Sudeesh-a'n a hlai lut nalh hle. Odisha goalkeeper Amrinder Singh-a'n hna a ngah a, a dang vek seng lo. Minute 89-naah Leon Augustine-a'n Punjab tan goal pawimawh a khung a, 2-0 a nih chiah. Injury time-ah Punjab keeper Ravi Kumar-a'n an lamah tilut mah se mualneitu hi 2-1 in an chak ta tho.
Mohammedan an vanduai
ISL kai thar Mohammedan SC pawhin FC Goa lakah Alexis Gomez penalty hmangin minute 66-naah hma an hruai a, Kolkata club hi chak hmel hmu turah inngai hman mah se injury time-ah Goa tan Armando Sadiku-a'n siphurh a sut.
Mohammedan tan hian Zodingliana Tochhawng, Vanlalzuidika Chhakchhuak leh Lalremsanga Fanai ten bul an ṭan a, bench aṭangin K. Lalrinfela a lut. Hnahthial tlangval Mafela hian Aizawl FC aṭangin ISL club hi kumin nipui bazarah khan a zawm a ni.