Newcastle-in hmahruaina hun ṭha bawhpelh

Tun season-ah Newcastle United-in season bul an ṭan ṭha a, Craven Cottage an hmachhawn hma zawngin hneh loh an tawng lo. Eddie Howe-a hoten Fulham hneh se, pakhatna dinhmun luah lailawk thei tur ni mah se hun ṭha an bawhpelh.

Newcastle-in bul an ṭan ṭha a, Joelinton goal khung chu offside vangin pawm a ni lo. Mahse, goal khung an pawm loh aṭanga second 44-naah Raul Jimenez-a'n mualneitu tan a khung a, Arsenal aṭanga Fulham pantu Emile Smith Rowe-a'n a khung belh bawk.

Magpies-in first half-ah goal khat chiah goal zawnah pet mah se second half ṭan aṭanga second 28-naah Harvey Barnes hmagin siphurh an sut ṭhen. Team pahnih an inhnehtawk a, hun tawp hma hretin Newcastle captain Bruno Guimaraes ball clear ṭhat tawk loh chu Reiss Nelson-a'n chak nemnghehna goal khung nan a hmang.