Kompany-a enkawl Kane leh Bayern an vul

Bayern Munich chuan an mikhualna ramah Werder Bremen chu 5-0 in an sawp a, striker ṭha Harry Kane chuan goal khat khungin Bundesliga bikah goal 41 a khung tling ta chiah - English player zingah German football inelna sanga goal khung tam ber a ni.

Inrinni zan Weserstadion-a inkhelah Vincent Kompany enkawl Bavarians hian goal khung an thei cher cher hle - Michael Olise chuan goal hnih khungin Jamal Musiala, Kane leh Serge Gnabry ten goal khat ṭheuh an khung bawk.

Tottenham striker hlui Kane hian English player zinga Bundesliga goal khung tam lamah Jadon Sancho (40 goals) a lehpel ta chiah, season hmasa nipui mai khan Bayern hi a zawm a, record siam turin hun a mamawh rei lo hle.

Kum 31 mi Kane-a'n tun season Bundesliga match pali aṭangin goal nga a khung tihna a ni. Werder Bremen lakah hian goal a khung bakah Olise leh Gnabry te khung tur a siamsak bawk a, season duhawm hmangin a thawh hlawk thei takzet.

Tun hnaiah Kane hian sulhnu ropui a nei chho deuh mawlh mawlh - Dinamo Zagreb an sawp ṭumin English player zinga Champions League goal khung tam ber record a lo siam tawh bawk.

Bundesliga lama Sancho-a record khung tur hian match 36 chauh a mamawh, record hmasa chelhtu Sancho khan match 118 chhung a hmang thung, an in mamawh tlem hleih hle - an khelhna club leh khelh dan phung a inang lo tih erawh hriat a ṭha.

Kompany enkawlna hnuaiah Bayern Munich an vul chho mek a, hna a thawh ṭan dawna amah ring zo lotute rinna a hlawh chhuak mek bawk. Bavarians manager chuan, "Match zawng zawng hi kan ngai pawimawh vek, tih mai mai a thiang dawn miah lo.

"Kum danga tih ṭhin danin tunah chuan Oktoberfest lamah kan kal ang, chumi hnuah chuan kan match khelh hmabak kan ngaihtuah leh ang. Oktoberfest avangin match kan ngaihthah dawn tihna erawh a ni chuang lo," tiin a sawi.

Oktoberfest hi khawvela Beer Festival lian ber a ni a, Germany khawpuiah September thla tawp aṭanga October thla tirah an hmang ṭhin. Bayern Munich player leh coaching staff pawh intihlim turin an feh chhuak ve dawn tih a chiang.

Kompany-a naute hian an match lehpekah chuan Bayer Leverkusen an hmachhawn dawn - Xabi Alonso enkawl Leverkusen hi champion lai an ni a, an inkhel tru hi season tir lam ni mah se nomawi inchuhna match pawimawh zinga mi a ni dawn.