Juve leh Napoli inhnehtawk

Inkhelh ṭan hmain Napoli manager Antonio Conte chuan eng team pawhin hnehna chang se lawm taka awm phu ve ve an ni tih a sawi a, an mikhualna ramah Juventus chu goal awm loin an inhnehtawkpui.

Conte-a'n Napoli a din thar leh mek a, an nghet leh tawh hle. Inrinni zan Serie A inkhelah hian match dang ang bawkin Old Lady tlarhnung a phui ṭha, goal khung erawh an harsat chhunzawm hle.

European League lian panga zingah Juventus chauh hi tun season chhunga league goal la chhuah lo an ni. Mahse, Thiago Motta-a naute hian tun thla tir aṭang khan Serie A goal an la khung bik miah lo thung.

Naples club nen an inhnehtawk hma hian AS Roma leh Empoli te chu goal awm lo bawkin an lo inhnehtawk pui tawh a, champion tuma inel tak tak tur chuan an tlarhma lam an insiamṭhat a ngai dawn hle tihna a ni.

Juve manager Motta chuan, "Goal kan khung loh avangin sawisel kan hlawh tih ka hria, a bik takin striker Dusan Vlahovic demna thu a ri ring tih pawh ka hria, kan chet dan erawh mimal ni loin kan zavaia mawhphurhna a ni thung.

"Kan khingpui khan hmun awl min siamsak miah lo a, khatiang inkhela goal khung dan khan ngaihtuah chhuah a ngai," a ti a, a striker Vlahovic chu ven bik a nih avangin atan a harsa tih a sawi tel bawk.

Napoli coach Conte chuan, "A hmawr kan bawk lohna kha a te thei hle, player pakhat leh pakhat inhmachhawn tawha kan paltlang lo ṭhin kha a pawi, harsa vak loa siamṭhat theih mai erawh a ni ang," a ti. Allianz Stadium aṭanga point hlawh chhuah chu result ṭha a ni tih a sawi bawk.

Serie A match nga aṭangin Napoli hian point 10 hmuin pathumna dinhmun an luah a, point kua nen Juventus hi an hnuaiah an awm thung. Nizan khan champion lai Inter Milan leh AC Milan ten match pawimawh an khel ve thung a ni.