MVA-in state referee 26 neih belh

Mizoram Volleyball Association chuan September 20, Zirtawpni khan Hotel Chhungte International, Electric Vengah State Referee exam thar mi 26 te result a ti chhuak a, exam beitute hi an tling vek.

MVA president Dr. Lalmalsawma Nghaka chuan, "District leh Zone te'n referee ṭha tak tak nei mah se, National Referee leh State Referee-te an pawimawh. MVA Tournament a ni emaw, District leh Zone Tournament a ni emaw, MVA hriatpuina tournament-ah reng reng chuan hman theih reng leh hmantlak ngei tura chherchhuah in ni a. Exam dan pawh theory, practical leh viva hmanga exam-a tling an ni," a ti.

Dr. Mala chuan tun laiah internet leh broadcasting-ah hma sawnna a nasa tih sawiin, tournament an neih reng reng chu TV emaw, YouTube emaw kaltlanga live telecast a ni tlangpui tawh tih sawiin, an tihsual leh tih dik loh a lang hma tawh em em tih a sawi bawk. Chuvangin referee te chu player-te zahtlak khawpa nungchang fimkhur a, eizawnna satliah chauh a ni lo, tih hre turin a chah bawk.

State Referee tling thar zinga ti ṭha zual panga te chu Rs 2000 ṭheuh pek an ni.