PSG chak tluang lai a tawp

Paris Saint Germain chu an khingpui Reims nen 1-1 in an inhnehtawk a, tun season Ligue 1 match vawi nga an khelh tawh china point an hloh vawi khatna a ni, table chung berah erawh an awm chhunzawm.

Ligue 1 champion PSG hian season bul ṭan fuh viau mah se Reims mualah inkhelh an harsat, minute kuanaah Reims tan Keito Nakamura chuan goal a khung a, hun rei tak chhung anmahni goal an venghim zui.

Champions League khel chau PSG tan substitute Ousmane Dembele chuan second half-ah si phurh a sut hram a, point thum hlawh chhuak zo ta chiah lo mah se hneh loh nei loa an kaltluan erawh an la vawng nung.

PSG manager Luis Enrique chuan, "Kan khingpui khan anmahni goal venhim chauh an ngaihtuah a, khelmual chanve chinah khan an ding khawng tlat, counter attack an neih hmasa berah goal an khung hlauh bawk.

"Goal an neih chiah khan a venhim kawngah an inringtawk zual sauh bawk a, kan tan hna a harsa zual phah hle. Ni danga ka sawi tawh ang khan ka naute rilru put hmang hi a dik ṭhin, chu chuan min ti lawm," tiin a sawi.

Paris club hian kar tawpah Rennes an mikhual dawn a, chumi hnuah Champions League khel turin Arsenal khelmual Emirates Stadium an pan chhunzawm leh ang.