Vinicius telna Real Madrid an danglam

Carlo Ancelotti-a'n a player ṭha Vinicius Junior a hahchawlhtir hmasa a, goal an mamawh hunah erawh Brazilian forward hi dah luh niin inkhel hmel hmanga ti danglam - goal an phurh hmasak hnuah Espanyol chu 4-1 in an sawp.

Santiago Bernabeu Stadium-ah Real Madrid hi awlsam takin an chak mai bik lo, second half tir lamah Thibaut Courtois chuan anmahni lamah a ti lut palh, goal luh hi minute 54-na niin manager Ancelotti a harh chhuak nghal.

Goal an chhuah hlimah Arda Guler la chhuakin Vinicius Jr. a dah lut. Brazilian forward Vinicius hian danglamna a siam viau - Real Madrid goal nawr a na sawt. Dani Carvajal-a'n si phurh a sut hnuah Vini hian Rodrygo tan a siamsak, assist hi duhtawk mai loin an goal thumna a khung bawk.

Hun tawp dawnah Spanish champion hian penalty an hmu. France captain Kylian Mbappe chuan Real Madrid tan a zawna a match li chhung goal a khungna ni turin a pet lut a, mualpho thei dinhmuna ding hman kha a tawpah an chak chiang hle.

Real Madrid manager Carlo Ancelotti chuan, "Seconc half-ah khan goal khung theihna remchang a rawn inher chhuak chauh a, kan khingpui lamin goal an neih hnu khan a khelh dan an thlak, khami tak kha kan tan remchang a ni ve thung.

"Tunah hian season hmasa nena chhiar zawm chuan La Liga match 38 chhung tlawm loin kan kaltluang tawh, duhthusam ang thlapa khelh vek theih ni lo mah se kan sulhnu en chuan kan khel chhe loin kan ti ṭha thawkhat viau tih a lang," tiin a sawi.

Spanish champion hian tun season La Ligue match vawi nga an khelh tawhah an khingpui te vawi hnih an inhnehtawk pui tawh a, point 14 nen pahnihna an ni mek. Nizan khan hmahruaitu Barcelona an inlan a, an inkara point khat awm mek hi a danglam leh thei ang.