Champion beisei ngam Liverpool leh Chelsea

Tun season Premier League-ah champion turin nizana inkhel Manchester City leh Arsenal te hming a lian a, mahse Inrinni zana hnena chang Liverpool leh Chelsea te hming lam hmaih a thiang lo. Anfield-ah Reds-in AFC Bournemouth chu 3-0 in an sawp a, Blues-in West Ham United 3-0 a sawpin London Stadium an luhchhuah.

Arne Slot-a hote hian match ngaah point 12 an hmu a, Enzo Maresca hote point riat hmuin table chung lamah an awm ve bawk. Liverpool hian September 24, Nilaini zan hian League Cup-ah Hammers an hmachhawn ang a, Chelsea-in League Two club Barrow an hmachhawn thung ang.

Hlimna Par

Liverpool-in season bul an ṭan ṭha a, mahse international break zawhah Nottingham Forest lakah 1-0 in an tlawm. Reds hlim niten rei an daih dawn lo emaw tih hnuah Slot-a hote an tho chhuak lehnghal a, kar laihawla AC Milan an hneh hnuin nuam sak takin Cherries an hneh leh bawk.

Mahse, Anfield-ah thinphu a rang hman. Minute lina lekah mikhual Bournemouth-in Antoine Semenyo hmangin goal khung hmasa hmanah inngai mah se VAR hmanga ennawn a nih hnuah offside vangin pawm a ni lo.

Reds an chesual nawn lo a, tlarhnung an tih phui bakah an goal bawh a na sawt. Luis Díaz chu Liverpool tana hlimna thlentu a ni a, Colombia winger hi a nung ṭha hle. Goal hmaah Mohamed Salah a vannei tawk lo a, Alexis Mac Allister ball pass ṭha bik chu goal-ah a chantir thei lo.

Salah goal khung loh zanah Diaz a rawn pen chhuak a, minute 26-naah Liverpool number 7 hian goal class zet a khung. Diaz hian Ibrahima Konate ball vawrhchhuah chu ṭha zeta la thlain cool zetin a khung.

Minute hnih hnuah Diaz bawk hian Trent Alexander-Arnold ball pek chu a pet goal leh a, inkhel a nung chhunzawm zel. Darwin Nunez-a'n minute 37-naah goal mawi bik a khung a, first half-ah 3-0 a ni.

Second half-ah Liverpool-in goal khung belhna remchang an nei a, Nunez-a'n hun ṭha dang a khung theih lo bakah substitute Federico Chiesa pawhin Cherries keeper tan hna a siam.

Reds hi 3-0 in an chak a, point thum hlawh chhuak mah se an khelh dan a famkim lo. Bournemouth-in Liverpool tlarhnung an rum ṭhaih fo a, Slot-a'n nomawi chawi a tum a nih chuan tlarhnung rem phui ṭhat lehzual a ṭul ang.

Rin tur Chelsea

Season tir lama player ngah vangin Chelsea squad chu fiamthu thawhna ang hial a ni a, mahse inelna ṭan meuh chuan Enzo Maresca hote hi team satliah an ni lo tih a lang. Blues hian West Ham lakah team ṭha an ni tih a pholang a, 3-0 a hnehna an chan bakah an squad a chhah ṭhat avangin champion tura ring tawk an awm a nih pawhin thil mak a ni tawh lo.

Chelsea-in goal an khung hma a, minute lina lekah Jadon Sancho ball pek chu Nicolas Jackson-a'n la lutin Alphonse Areola kap karah a khung. Blues an hmuhnawm zel a, Cole Palmer-a'n goal hnihna a khung teuh hle.

Minute 18-naah Jackson bawkin goal a khung a, Moisés Caicedo through ball ṭha zet chu um lutin cool takin a khung. West Ham-in thawhchhuah tumin an nawr let a, penalty an beisei pek an nih loh bakah Mohammed Kudus-a goal khung chu offside vangin pawm a ni lo.

Hammers-in first half tawp lam rawn khar ṭha mah se Blues-in second half-ah bul an ṭan ṭha. Palmer-a'n player danglam bik a nihzia pholangin minute 47-naah Chelsea goal hnihna a khung. Goal thumna an khung avangin Chelsea-in nuam sain hnehna an chang a, Joao Felix leh Christopher Nkunku ten an khung belh leh teuh hle.