United tan khua a var lo

Manchester United-in international break zawh match hnihah goal 10 khung mah se Selhurst Park-ah goal an khung thei lo. Erik Ten Hag-a hote Inrinni zan khan Crystal Palace nen goal awm loin an inhnehtawk a, point khat chauh an hlawhchhuah avangin table-ah pawh 10-na zingah an tel pha lo.

Red Devils-in bul an ṭan ṭha a, inkhel ṭantirh lamah inkhel thunun goal chance pawh an ngah. Marcus Rashford aia bul ṭan Alejandro Garnacho-a'n chance ṭha a ngah a, Man United academy chhuak Dean Henderson a paltlang thei lo.

Garnacho hian Henderson chauh hmachhawn hnua a khung loh bakah crossbar a pet per a, corner kick aṭangin Matthijs de Ligt leh Joshua Zirkzee ten tauh goal theihna tur an khung lo ve ve. Lisandro Martinez pawhin pet goal theihna a nei a, Bruno Fernandes pawhin crossbar a pet per.

Mahse, first half tawp lamah Palace an insiamrem. Eberechi Eze-a'n chance ṭha bik a hlah a, Crystal Palace midfielder hi goal hmaah hriam se point thum an hlawhchhuak thei ang. Eze hian seocnd half-ah pawh hnai tak aṭangin a hlah.

United tan Andre Onana-a'n a hna a thawk ṭha bawk a, Jean-Philippe Mateta goal khung tur a dan per chu Ismaila Sarr-a'n goal-ah pet leh mah se Cameroonian keeper hian a dang hman tho. Man United-in chak tumin bench aṭangin Rasmus Hojlund leh Marcus Rashford te luhtir mah se danglamna a thlen thei lo a, chak mamawh tawh laia tlarhnung lama muang taka ball an inpe kual sek chu United ṭantute tan hmuh a hrehawm ang.