REC Open Talent Hunt-ah Mizo boxer che ṭha

REC Open Talent Hunt for Youth and Elite Men and Women Boxing Championship chu September 14-21, 2024 chhung khan Guwahati-ah neih a ni a, Mizo boxer-te an che ṭha. Lalnunpuia, R. Malsawmtluanga leh Naomchinsannuami ten gold medal an hnek chhuak.

P. Lalchamliana fapa Lalnunpuia hi Lunglei Bazar Venga cheng a ni a, hmabak a nei êng. Tuna hian Centre of Excellence (Rohtak)-ah awm mekin gold medal la tur hian Services Sports Control Board (SSCB) boxer ṭha chu final-ah 5-0 in an hneh.

Chaltlang Lily Venga cheng R. Malsawmtluanga hi Army Sports Institute, Pune-ah a awm mek a, final-ah Haryana boxer chu 5-0 thoin a hneh. Naomchinsannuami hi Chaltlang Lily Venga cheng niin Mizo hmeichhe boxer ṭha ber zinga mi a ni a, amah hi NCOE, Guwahati-ah awm mekin final-ah Uttar Pradesh boxer chu 5-1 in an hneh.

SAI (Aizawl) aṭangin boxer pali an tel a, Lalringngheti'n silver a la, CoE (Itanagar) aṭanga tel Moses Lalruatfela'n bronze medal a la a, CoE (Rohtak) aiawh Lalhruaitluanga erawh quarterfinal-ah a vanduai thung.