Olympic medal beiseitu Paes

Indian tennis player Leander Paes chuan a hun hnuhnung lamah hlawhtlinna chan a duh a, nakkum nipui laia neih tur Tokyo Olympic an khelh hunah ram tan medal hlawh chhuah ngei a duh thu a sawi chhuak.

Nakkum January thlaa kum 48 tling tur Paes chuan, "Olympic a inlan hi a danglam ṭhin, ram tan fehchhuah satliah a ni lo a, medal lak châkna hi a sang ṭhin em em a ni. Nakkumah pawh khatiang boruak kha a ni leh dawn.

"Tunah hian tennis season thar hman dan tur a la chiang lo a, hri leng vangin engkim mai hi a chiang hleithei ṭhin lo. Olympic pawh hi kan khel thei kher ang em tih chu zawhna a ni a, kan inlan theih a nih ngat chuan India tana medal lak ngei ka tum ang," a ti.

Nikum December thla khan Paes hian Tokyo Olympic zawh hunah tennis khelh a chawlhsan tur thu a lo sawi tawh, Japan khawpuia inelna lian hi Olympic a hmachhawn vawi riatna tur leh hnuhnung ber a ni dawn.