Marquez-a'n hma a sawn zel

Repsol Honda chuan an rider duhlai Marc Marquez a dam zel thu an sawi a, zai a nih avanga damdawi inah ni 10 a awm hnuin a chhuak leh thei tawh - training pangngai erawh a la nei thei rih lo ang.

Spanish tlangval hi MotoGP 2020 season bul ṭannaah a chesual a, a ban dinglam ruh zai a ngai. A hliam hi rei vak lo hnua dam leh mai turah ngai mah se a dam thei mai lo a, ṭum thum ngawt an zai nawn hial a ni.

Tun thlatir khan Hospital Ruber Inter-nacional, Madrid-ah Marquez hi dah luh leh niin, December 3 khan an zai. Dim leh uluk taka enkawl zui a ni a, damdawi lam thiamte chuan a hliam hi an zai hlawhtling tih an sawi chhuak.

Repsol Honda chuan thu chhuah siamin, "Zai a nih hnuah Marc Marquez pawhin ṭhat lam a pan zel. Damdawi in a chhuahsan dawnah uluk takin endik leh a ni a, a taksa dinhmunah hian medical team lam chu an lawm hle," an ti.

Honda rider hian tun hnaiah MotoGP a thunun hneh hle a, a dam a nih phawt chuan amah el phak an awm meuh lo a ni ber. Kuminah erawh hliam vangin inelna a hmachhawn ve thei ta lo, season tharah chuan a intlansiak theih ngei a beiseiawm.