Rossi hma hun tur a chiang

Valentino Rossi chuan tun season chhung bak chu Monster Yamaha bike a khalh tawh dawn lo a, a hma hun tur an inrinsiak mek laiin Italian rider hian Petronas Yamaha a zawm tur chu a chiang tluk a nih tawh thu a sawi.

Italian rider chuan, "July thla a world championship kan neih ṭan khan ka team thar zawm tur hi 99% in a chiang tawh, thu a ziah fel vek la ni lo mah se nakkumah chuan Petronas tan ka tlan ang tih a chiang," a ti.

Rossi a chhuah chuan Fabio Quartararo-a'n a hmunruak a luah ang, Petronas Yamaha tan hian Rossi leh Franco Morbidelli an inkawp ve thung dawn a ni. Rossi hi a vanglai liam deuh tawh mah se bike intlansiakna sang ber aṭangin chawlh mai a la tum lo.

Pathianni zan dar 6:30 hian Circuit de Barcelona-Catalunya-ah Catalan Grand Prix an tlan leh dawn. Champion lai Marc Marquez chu hliam vangin a la inlan thei dawn lo a, rider che ṭha fal an awm loh avangin champion tur rin thiam a la har hle.