Max lungawi lohna kan hrethiam - Horner

Tun hnaiah Max Verstappen chuan an car engine vanga buaina an tawk fo chu ṭha lo a tih thu a sawi chhuak a, a team chu inenfiah turin a duh. Red Bull team principal Christian Horner chuan an driver lungawi lohna hi an hriatthiampui thu a sawi.

Dutch tlangval Max hi tun hnai intlansiak hnuhnung pahnihah a tlan tluan thei lo, engine lamah harsatna a tawk ṭhin. Season bul ṭanna Austria-ah pawh khan khawl lamah hian harsatna a lo thlawk tawh.

Red Bull an chet fuh loh avangin Verstappen tan world champion nih beiseina a tlem tawh hle, an elpui leh team leh champion lai ni bawk Mercedes erawh an chesual ve duh lo - Lewis Hamilton chu a vawi sarih nan a champion dawn ngei niin a lang.

Horner chuan, "Max lungawi lohna hi a awm kan ti a, kan hriatthiampui hle. Car chak leh ṭha tak mai kan nei a, mahse eng emaw lai fuh tawk lo a awm zauh ṭhin hi keini pawhin pawi kan ti takzet.

"Kan driver hian a ṭha ber dinhmun luah turin theihna a nei tih kan hria, chumi a thlen theih nana pui turin team lamin hmasawn kan ngai," a ti. Red Bull hian tun hmain Sebastian Vettel chu world champion vawi li an nih pui a, a hnu lamah erawh an la hlawhtling thei rih lo a ni.

Car intlansiakna sang ber season kal laiah Verstappen hian point 110 hmuin championship table-ah pathumna a ni mek, an chungah hian Valtteri Bottas (135 points) leh Lewis Hamilton (190) te an awm mek. Pathianni tlai dar 4:40 hian Sochi Autodrom-ah Russian Grand Prix an tlan leh ang.