Favre ban hnuah Dortmund an chak

Borussia Dortmund chuan coach Lucien Favre an ban hnua an match hmasa berah Werder Bremen 2-1 in an hneh. Coach lailawk Edin Terzic tan point thum hmuh hi chanchin lawmawm a ni ang.

Thawhlehni zan Bundesliga inkhelah Dortmund tana Raphael Guerreiro goal khung chu Bremen lamin Kevin Mohwald hmangin an sut a, team pahnih hi an inhnehtawk dawn niin lang hman mah se captain Marco Reus-a'n chakna goal a khung a ni.

Erling Braut Haaland inhliam karah kum 16 mi Youssoufa Moukoko chu khelhna hun pek a ni leh a, German rawlthar hian goal khung theihna hun ṭha nei mah se keeper Jiri Pavlenka a paltlang zo lo.

Beisei anga season bul an ṭan fuh loh avangin Dortmund hian coach Favre an ban a, assistant coach Terzic bakah youth team coach pahnih Sebastian Geppert leh Otto Addo te chu tun season tawp thleng team enkawl lailawk tura tih an ni.

Dortmund hian tun hnaiah hliam vangin Haaland an chhawr thei lo, an striker duhlai hi nakkum January thla thleng chu a chawlh a ngai dawn. A hmun ruak luah khat tur hi thlasik barzarah lak tumna erawh a awm lo thung.

Borussia Dortmund sporting director Michael Zorc chuan, "Erling hi a dam a nih phawt chuan inkhel zawng zawnga inlan duh mi a ni a, hei vang hian transfer bazar inhawn hunah pawh player dang lak a ngai kan ti lem lo.

"Hliam vangin Erling a chawl tih kan hria a, a hmun ruak luah tur lak pawh thil tih awm tak a ni. Mahse, rawlthar Youssoufa tan hun ṭha a inher chhuak a ni ve mai, ani hian theihna a nei sangin hma a sawn theih nana puih hi kan tih tur a ni," a ti.

Bundesliga club hian Krismas chawlh an neih hmain match pathum khelh tur an la nei. Zirtawpni zanlai hian league match khel turin Union Berlin an lenchilh leh nghal ang.