Kolkata-ah I League khelh tum Chanmari inlan dawn

I League 3 group C hmahruaitu Chanmari FC chuan final round khel turin September 22 khan Kolkata khawpui an thleng a, vawiin tlai dar 3:00 hian group stage-a an hneh tawh hnu MYJ–GMSC nen an inhmachhawn ang.

Mizo club hian group stage inelna Aizawlah thlengin, an khelmual hman thiam sa RG Stadium an hmang thei a, match li an khelhah hnehna chang vek chungin final round hi an lut - match thum an khelhin an lut fel der tawh.

Mahse, Mizoram Premier League club-in hma an hruaina hmun hi Aizawl khawpui a ni a, Kolkata nen a boruak a inang dawn lo - Lalsangzuala Hmar enkawl team hian 'home advantage' an nei tawh dawn lo a, an khelh ngai lohna Kalyani Stadium-ah an khel dawn.

Mahse, Mizo club-in Pathianniah Kolkata an thlen avangin ni hnih ngawt training-na hun an nei a, West Bengal khawpui lum kara inkhel turin an insiamrem hman tura ngaih a ni - inkhel hi Indian Football YouTube channel-ah live-in a en theih ang.

I League kalkawng

Indian football-in kalphung mumal zawk zawm tumin ruahmanna thar an siam a, season hmasa aṭang khan I League 3 hi khelh ṭan a ni - Indian football-a fourth division inelna thar a ni a, a chungah hian I League 2, I League leh ISL te an la awm.

Tun season I League 3-ah hian team 25-in inelna an hmachhawn a, heng zinga team 21 chu state champion emaw State FA-in an aiawh tura a thlan club-te an ni a, season hmasaa playoff khel phak, mahse, paltlang lo club pahnihin an khelh chhunzawm a, I League 2 aṭanga relegate club pahnih an tel bawk.

I League 3-a team 25-te hi group pangaah, team panga zel awmin ṭhen hran an ni a, group tina a sang pahnihte chu I League 3 final round khel tur hian an tling - Chanmari hian match liah hnehna an chang vek a, an inpetkai chiang hle.

Mizo club hian match li lekah goal 12 ngawt an khung a, an lamah goal hnih chiah a lut - tlawm an nei lo bawk a, I League 3 final round-ah pawh a tawhkhirh pawl ni tura ngaih an ni.

Hello I League

Mizoin I League club Aizawl FC kan nei sa a, AFC hian I League an khel a ni satliah lo a, India rama league sang ber a nih lai, 2016-17 season khan Khalid Jamil-a hnuaiah champion nomawi an chawi hial.

Chanmariin tunah an hnungzui tumin I League 3 an hmachhawn. Mahse, I League inpetkai tur erawhin kawng a la thui deuh - final round-ah hian team 10-in inelna an hmachhawn a, group pahnihah team panga ve ve awmin ṭhen hran leh an ni.

Group pahniha a sang pahnihte hi nakkuma khelh tur I League 2 khel turin an tling dawn - pathumna ve ve te chu 2025/26 season atan I League 2 an tling bawk ang. A tawi zawnga sawi chuan team 10 aṭang hian team pali chiah an tla tawh dawn tihna a ni a, team parukin I League 2 an khel dawn tihna a ni.

Group A leh B-a hmahruaitu ve vete hian final an khel leh dawn bawk a, Chanmari tan national level-a champion ni turin kawng a inhawng tihna a ni - a pawimawh hmasa ber erawh GMSC laka hnehna chan a ni.

Elpuite chu

Vawiina Chanmari hmachhawn tur GMSC hi Mumbai club an ni a, Aizawla an intawn ṭum khan mikhual club hian defensive game an khel - mahse, CFC-in an nawr reng a, minute 81-naa MS Dawngliana goal hmangin Chanmari an chak daih.

Mumbai Premier League champion GMSC player zingah Himanshu Patil chu ven bik ngai tur a ni a, ani hian RG Stadium-ah goal ruk ngawt khungin, I League 3 group stage-a goal khung hnem ber a ni.

RG Stadium-a goal venhim hna thawktu GMSC hian Kolkata khawpuiah chuan goal ven ringawt an ngaihtuah tawh dawn bik lo a, midfielder Shanon Pereira leh full back Keegan Pereira te pawh player ṭha an ni - Pereira hi ATK, Bengaluru FC, Mumbai City leh NorthEast United tan pawh a lo khel tawh.

Telangana club Abbas Union FC hi group E-a hmahruaitu ni chungin final round inpetkai an ni a, vawi khat chiah an tlawm. Dalbir (Punjab) leh Sports Academy Tirur te pawh Chanmari group-ah tho awmin, team ṭha tak vek an ni.

Chanmari an ṭha

MPL khelh mek a nih bawk avangin Mizo club tan I League 3 khelh a hautak lehzual a, mahse, final round an luh tawh miau avangin Mizo club tan inelna namnul chi a ni lo - coach Sanga hoin group stage-a player pawimawh rualte nen Kolkata an pan.

NorthEast United striker hlui Lalkhawpuimawia (Mapuia) tawnhriat chu Chanmari tana ṭangkai tur a ni dawn a, Mohammedan SC tana Kolkata khawpuia si ban lo nghak tawhtu goalkeeper Zothanmawia'n a tawnhriat hmangin a team puih a tum bawk ang.

Chanmari player zingah Vincent Lalduhawma chu group stage-a goal khung hnem ber niin, goal li a khung a, GMSC hian an intawn hmasaka an ngam loh Dawngtea an theihnghilh dawn lo.

Tlarhnungah Mizoram captain Lalrinchhana Tochhawng a awm dawn a, defensive midfield-ah Bengaluru player hlui Malsawmzuala a awm bawk avangin Mizo club hi team ṭha zawk tia chhal ngam an ni a, Kolkata khawpuiah GMSC hneh nawn an châk ang.