Chawnpui = Chanmari 'B'; Bethlehem an tla

LZ Juice MPL11-ah Chawnpui FC-in Chanmari FC 'B Team' an hmachhawn chungin hnehna an chang thei lo a, goal awm loin an inhnehtawk. Nimin inkhel hnuhnung zawkah Sihphir Venghlunin FC Bethlehem 3-1 in an hneh a; Sihphir Venghlun hi a sang pali zingah invawrh chhoin Bethlehem erawh an relegate thung.

Hun ṭha bawhpelh

Chawnpui FC leh Chanmari FC ten hun ṭha an bawhpelh ve ve. Lalrindika Hmar hote hian Chanmari team ṭha ber an hmachhawn lo a, I League 3 khel lo ho zawng an hmachhawn avangin chak tura rinkai zawk an ni. Mahse, Chawnpui hi Chanmari lakah an chungnuung bik lo a, Chanmarians-in goal chance an ngah hial zawk.

Chawnpuiin palinaa dinhmun sawhngheh theihna hun ṭha an bawhpelh a, Chanmari pawhin pakhatna dinhmun luah theihna hun ṭha an bawhpelh ve tho. Chanmarians hian hnehna chang se chuan Aizawl FC chungah an awm ang a, league champion ni turin midang result-a innghah a ṭul lo ang. Tunah erawh Chanmari tan league-a pakhatna ni turin Aizawl FC chetsual a ngai.

Bethlehem an tla

MPL aṭangin pariatna an relegate ṭhin a, FC Bethlehemin table mawngphah an chhuahsan theih tawh loh avangin an relegate. Nimin inkhelah Bethlehemin relegate loh tumin ṭan an khawh a, Sihphir Venghlun lakah Lalnunzira Sailo hmangin an pet goal hmasa hial.

Mahse, relegate hlau FCB aiin semifinal khel châk Sihphir Venghlun an ṭang rei thei zawk a, Robert Laldinthara hoten Lalthanpuia hmanga first half-a si phurh an sut hnuah Malsawmtluanga Hrahsel leh Lalbiakzuala te hmangin second half-ah an lehthal.

Sihphir Venghlun hi palinaah awm lailawk mah se league champion nih tum Aizawl FC an hmachhawn lehnghal dawn a, semifinal khel pha turin kawng a la hautak hle.