Arsenal tan indahṭhat hun

Zanin dar 12:15 hian Arsenal chuan League Cup third round khel turin Bolton an mikhual dawn - Mikel Arteta tan a player khel rim leh ṭhate hahchawlhtir theihna hun ni tura ngaih a ni.

Gunners hi Championship team lakah rinkai leh buk rit zawk an ni a, chutihrualin awlsam taka paltlang ngawt theih erawh an ni bik lo ang, team pahnih hi vawi 134 an in tumna tur ni mah se, kum 2012 hnua an inkhelh lehna hmasa ber tur a ni thung.

Tun hnaiah Arsenal hian inkhel hautak an hmachhawn nasa - Tottenham nen North London Derby an khelh hnuah Champions League khel turin Atalanta an lenchilh a, kar tawp khan Etihad Stadium-ah Manchester City an hmachhawn bawk.

Arteta naute hian an duh thlang thei ni se la chuan Premier League nomawi chawi an duh berin a rinawm, chuvangin League Cup hi chu thapui thawh nan an hman a rinawm lem loh a, a khel khat deuhte tan intuai hriam theihna remchang a ni ang.

Hliam vangin Takehiro Tomiyasu, Martin Odegaard, Mikel Merino leh Kieran Tierney te an chawl mek a, anni ho hi an inlan thei dawn lo - Bolton lamah erawh an player ṭha zingah hliam an awm lo thung.