Europa League : Manchester United an inlan dawn

25th September, 2024

European Football inelna sang pahnihna Europa League chu zanin hian tun season atan an khel ṭan dawn. Manchester United chuan Old Trafford-ah Twente an mikhual dawn. Ajax-a hlawhtlinna ṭhahnem tak chang tawhtu Erik ten Hag tan Dutch club hmachhawn hi thil thar a ni hran lo ang.

Premier League season hmasa table aṭanga teh chuan Man United hi Europa League khel phak lo tur an ni a, pasarihnaah an awm. Mahse, Ten Hag leh a naute hian FA Cup nomawi an chawi a, hei vang hian inelna an hmachhawn theih phah.

Man United season hman dan hi hriatthiam an harsa rih hle. Southampton (3-0) leh Barnsley (7-0) te an sawp thei a, an league match hnuhnung berah erawh Crystal Palace nen goal lut loin an inhnehtawk thung - tluk leh din fawmin hun an hmang a ni ber.

English club hian Europa League-ah sulhnu a nei ṭha, an inlan hnuhnung 24 aṭangin vawi khat chian tlawm an nei. Zanin hian Dutch club lakah inrintawkna sang tak nen an inlan dawn, kar tawpa Tottenham an hmachhawn tur erawh an ngaihtuah tel a ngai ve bawk ang.

Ten Hag-a'n hliam vangin - Leny Yoro (kephah), Luke Shaw (chawn), Tyrell Malacia (khup) leh Victor Lindelof (ke zungṭang) te a la chhawr thei dawn lo. Rasmus Hojlund erawh a inkhel thei tawh - Denmark international striker hian ngaiawh leh turin inkhelh tam a mamawh.

Man United hian tlarhnung laiah tute nge an rinrawl ber ni dawn a la hriat loh a, player thar Matthijs de Ligt leh Lisandro Martinez te chu inkawp tura ngaih an ni a, tawnhriat nei tam Harry Maguire chu zaninah a inlan a nih pawhin a mak lo ang.

Beisei anga season hmang lo Casemiro aiin Manuel Ugarte duh zawk a awm chhoin a rinawm a, tlarhnung pui thei tur an ni ang. Ball semtu lamah Kobbie Mainoo leh Christian Eriksen te an neih avangin Twente tan chuan dan an harsa in a rinawm.

Man United manager Ten Hag chuan, "Hliam kan neih tam em avangin season harsa tak a ni rih. Inthlak danglam kan ngaih ngun avangin kan khelh dan phung nghet pawh kan la nei thei lo," tiin a sawi a, inkhel thunun tak chunga chak an duh tih a sawi bawk.