Rodri tan season a tawp?

Manchester City midfielder pawimawh Rodri chu tun season chhungin a inkhel kan hmu hman tawh lo mai thei. A khup hliam chu zai a ngai dawn niin a lang a, zai a nih chuan a tan tun season chu a tawp rih ang.

Arsenal nen an inkhelh ṭumin Rodri hi a inhliam, a tirah Kai Havertz nen an insu tlu phawt - hetah hi chuan a la hliam na lo. A hnua Thomas Partey nen an intauh leh ṭum erawhin a inkhel zui thei tawh lo, thlak zui nghal a ngai.

Thawhṭanni khan Spain lamah a hliam enkawl turin a haw a, a khup hliam chu zai ngai tur anga sawi a ni. Mahse, thutlukna erawh an la siam vek lo a, tun kar hian an en dik nawn leh phawt ang.

Spanish midfielder hi Pep Guardiola enkawl Man City tana player pawimawh bik zinga mi a ni a, kumin tir lam khan Pep chuan, "Khawvela midfielder ṭha berte zinga mi a ni a, engkim mai hi a thunun thei," tiin a lo fak hial tawh a ni.

Guardiola-a'n player hrang hrang a siksawi karah pawh Rodri hi chuan a hmun pawimawh a chang chat chat zel a, hliam vanga a chawl rei a nih chuan Man City tan chuan luhaina tham a ni ang.

Chutihrualin, Premier League champion hian tawnhriat nei ṭha Ilkay Gundgan leh Mateo Kovacic te an la nei tho a, team dang aia player ṭha an ngah avangin an buai lutuk lo thei ve tho bawk - tun dinhmuna Rodri hmun ruak luah erawh a huphurhawm dawn.

Tun hnaiah Rodri hian Man City tan a zawnin match 52 teh meuh inkhel bul a ṭan a, inkhel bul a ṭanna Premier League bikah phei chuan tlawm an nei miah lo - Rodri ho chuan kum 2023 February thlaa Tottenham an ngam loh bak chu chak loh an nei lo a ni.

Hetih hun chhung hian hrem vangin season hmasa khan match pahnih khelh theih loh a nei thung, heng inkhelah hian Newcastle United leh Wolves te an hneh lo, an chakna chhan bik tia sawi a rem lo a nih pawhin Rodri telna Man City chu an danglam tih chu phat theih a ni lo ang.

Man City hian hliam vangin Kevin de Bruyne chu an chhawr thei lo mek. Belgium captain erawh a dam hnai tawh a, tlarhma lam puitu chu an neih ṭhat avangin season hmasa pawhin KDB tel loin an buai viau lo tih an lantir tawh a ni.