Nadal hmabak a hautak dawn

French Open 2020 khelh dan tur chu pawh fel a ni a, champion lai Rafael Nadal tan a nomawi humhim tur chuan kawlkawng hautak tak paltlang a ngai dawn - final hma chuan world number 1 Novak Djokovic nen an inhmachhawn lo thung ang.

Duhsak taka wildcard an pek Andy Murray chu amah ang bawka Grand Slam vawi thum champion tawh Stan Wawrinka nen an inhmachhawn nghal dawn. First round match bikah chuan anni pahnih inkhel hi mipui ngaihven hlawh leh hmuhnawm ber tura ngaih a ni.

A vawi 13 nana champion tum Nadal-a'n a match hmasa berah Egor Gerasimov a hmachhawn dawn, final kalkawngah US Open finalist Alexander Zverev leh tun hnaia khel ṭha tak Dominic Thiem te a hmachhawn thei dawn, Thiem hi Nadal elphak tur zingah a tel.

Italian Open champion Djokovic chu seeded pakhatna pek a ni a, ani hian Mikael Ymer hmangin inelna bul a ṭan dawn. Serbian tlangval hian final hma chuan seeded pahnihna Nadal emaw seeded pathumna Thiem a hmachhawn thei dawn lo.

Hmeichhe lamah champion lai leh world number 1 ni bawk Ashleigh Barty a inlan dawn lo a, world number 2 Simona Halep chu seeded pakhatna pek a ni. Romanian star hian kar hmasa mai khan Italian Open title a la, tun ṭumah hian rinkai ber a ni ang.

Grand Slam nomawi 24-na beiseitu Serena Williams chuan Kristie Ahn a hmachhawn dawn. American player pahnih hi US Open-ah pawh khan an match hmasa berah an lo intawng tawh, tawnhriat ngah Serena hi harsa vak loa tlang tura ngaih a ni.

French Open hi qualifying khelh mek a ni a, kar leh aṭangin inelna pangngai an khel ṭan ang. Season tira ruahman ang chuan May thlaa khelh tur kha a ni a, coronavirus vangin a hun hi sawn hlat a ni. Inelna buatsaihtu lam chuan a hmunah entu awmtir ngei an la tum ruh hle.

Tournament director Guy Forget chuan, "Ni khatah fans 5000 tal chu an awm theih ngei ka beisei. Kan inkhelhna zawng zawng zau zawng hi football khelmual 15 lenna tur khawpa zau a ni," tiin a sawi.

Paris khawpuiah hian hmun khatah mi 1000 chuang punkhawm phal a la ni lo a, amaherawhchu football match ṭhenkhatah chuan stadium chhungah mi 5000 luh an phal tawh. French Open hi chu stadium hrang hranga khelh tur niin, stadium pakhatah erawh a hlawmin an en dawn lo thung.