Nunsanga'n MMA Championship-ah gold la

ActiveFit Expo 2024 MMA India Open National Championship neih zawh takah Mizo fighter Lalnunsanga chuan gold medal a hlawh chhuak a, Chawnpui rawlthar hian Junior Featherweight (-65.8 kgs) category-ah gold hi a la a ni.

September 21, Inrinni - September 24, Thawhṭanni inkara neih inelnaah Nunsanga hian quarterfinal-ah unanimous decision-a hnehna changin, semifinal-ah TKO-in a chak leh a, final-ah phei chuan knee bar submission hmangin a chak a, he inelnaa hetiang submission tithei awm chhun a ni hial.

Hetihlai hian Mizoram State MMA Association (MISMA) hming ni loa feh chhuak, Kerala aṭanga inlan George Lalrammuanawma chuan gold a hlawh chhuak ve bawk a, LPS pro Muaythai fight-a pahnihna lo ni tawh George hian senior Featherweight category-ah ngamtu a tawng lo.

Mumbai khawpuia neih Championship-ah hian Mizoram aiawhin fighter pathum leh official pakhat an kal - MISMA aiawha feh chhuak Benjamin R. Lalremmawia, Ramthar North/ Ngopa Chhim veng chuan Youth–A Flyweight (-56.7 kgs) category-ah bronze a la bawk a, Mizo fighter-ten medal pathum an la tihna a ni.

Mizo fighter feh chhuak zingah Lalramsangliana, Bawngkawn South chu quarterfinal-ah a chak zo lo a, medal a la phak lo. Mahse, national level vawi khat khelhnaa a thlen chin a ropui a, Special Award hlan a ni. Uttar Pradesh aṭangin Marcus Lalsangzuala Sailo chuan inelna a hmachhawn ve bawk a, medal erawh a hlawh chhuak zo lo.

MISMA technical chairman Samuel Lalrozama chu National Board member a nih angin he inelnaah hian a tel a, ani hi national Referee & Judge Commission-te ho tura ruat a ni.

MMA India hian kum khat chhungin national championship vawi khat leh national open vawi 3-5 vel a huaihawt ṭhin a, tun ṭumah hian Sate leh UT 25 aṭangin fighter 384 an tel a, a pumpuiah Maharashtra champion-in, Karnataka-in an dawt a ni.

MISMA chuan Mumbai lama Mizo awmten theihtawpa Mizo fighter-te an lo buaipui avangin lawmthu an sawi.