Napoli fapa rangkachak, ensan hlawh zui Osimhen!

A la rei lo - hmanni lawk mai kha a la ni a, 2022-23 season mai chauh kha a la ni. Serie A-ah Napoli an champion a, an champion theih nana tha thawhhlawk em emtu Victor Osimhen-a'n Naples khawpuia ngaihsan a hlawhzia kha aw...

Football khawvelin a chanchin hahipin an sawi a, Nigerian striker hian eng ang taka ropuina nge a chan chhunzawm ang, tiin an inzawt a, European football-a club lian ber berte chil tiputtu a ni.

Mahse maw, mihring vul lai hi a lo rei lo takzet a, hlobet par ang chauh a nih chang a tam. Hmanni lawka European club-te âtchilh rawn Osimhen khan Turkey lama inkhel turin a puanthuah a tel a, khawvelin mak tiin a thlir a nih hi.

Manchester City, Liverpool, Arsenal, Chelsea leh Manchester United-te an mitthla pui, Barcelona, Real Madrid leh Bayern Munich te nena an hmeh bel khan Galatasaray a pan ta daih a, season khat loan-in a khel dawn - mak ti lo rual kan ni hleinem!

Hmanah chuan...

'Hmanah chuan...' kan han ti hluai tak na a, 'Hmanni lawkah chuan...' tih tur a ni zawk mah - season hmasa hmasa leh maiah kha chuan Osimhen hi Napoli fan-te beiseina siamtu, a player pui leh coach-te thlenga rinna tuhsaktu tiin an fak.

Goal a khung a ni satliah lo a, ropui leh mawi taka a khung 'kher' thin chu fan-te thinlung hnehtu a ni a, January 2023-a Jose Mourinho enkawl AS Roma an hneh ṭuma a goal khung phei kha chu tun thleng hian sawi a la ni.

Osimhen ball cross lo kal chu a awma la thlain, a malpuiin a sep leh a, boruaka ball awm lai tak chu mawi lutukin a hlap lut tehreng a nih kha - Napoli legend Antonio Careca chuan, "Pele meuh pawhin kha goal kha chu a chhuang ngawt ang," a ti thlawt!

Formula 1 driver lar Max Verstappen pawhin, "A mawi thlawt a ni," tiin a sawi a, ṭawngkam dang hawh tur a hre lo - khelmual chhung amite pawh mak tiin an hawihai a, khatiang em ema goal mawi live ngeia hmutu an ni kha vannei an inti hle.

Beiseina siamtu

Osimhen-a'n fak a hlawh em emna chu midangte tana beiseina siamtu a ni tlat kha a ni - coach, club leh fan-te thlengin an champion thei a ni, tih an rilrua tuhtu a ni a, kum 33 zet league nomawi chawi tawh Napoli hian amah vangin beiseina thar an nei a nih kha.

Pre-season laiin Nigerian forward hian a ṭhiante chu league nomawi beisei turin a fuih mawlh mawlh reng a, hetihlaia Napoli coach Luciano Spalletti chuan, "Osimhen-a beiseina ang hi midang rilruah tuh thei ila, nomawi chu kan zuam ang," a ti thlawt!

Osimhen danglamna chu amah aia team a dah hmasa chu a ni - i awih loh chuan Roma laka goal mawi a khung ṭuma an inkhel kha en leh ngat rawh. Minute 86-naah amah thlaktu Giovanni Simeone-a'n chakna goal a khung khan khelmual sira lo lawm nasa ber chu Osimhen a ni tlat.

Training zawh vek tawh hnuah pawh a cham bang a, coach Spalletti kaihhruaina hnuaiah a training belh tlauh tlauh zel - a first touch, a technique leh ball ken laia inrintawk theihna turin a zir reng a, player ṭha ber ni tura a beihna kawngah a awm mai mai lo.

Mi tuihal

Serie A champion an nih theih nana Napoli star Khvicha Kvaratskhelia chet dante kha sawi hmaih theih a ni lo a, midfield lama khaipa Stanislav Lobotka che vel pawh kha hmuhnawm a tling ṭhin.

Mahse, Osimhen awm loh laia Champions League-a AC Milan-in 4-0 zeta an sawp kha chuan Nigerian striker hming lo chu lam tur an hre meuh lo.

Italian chanchinbu lar Gazzetta dello Sport chuan, "Osimhen hian a ball hmuh apiang mai chu, Olympic 100m race-a tlan ang maiin a um leh chiam ṭhin," a ti a, he player hi chak duhin a tuihal a ni.

Mahse, a fuh lo lai a awm - a tha a khek thiam lo a, hetiang ang taka tha pe nasa na na na chu taksain a tuar bik tih loh rual a ni lo. Kum 25 mi striker hian an champion season-ah hian inelna hrang hrangah match 39 khelin goal 31 a khung a, assist vawi nga a nei.

Mahse maw...

Pangpar mawi ber pawh a chuai ṭhin a, chatuan atana rinawm intiamte pawh a tuk lawkah an inṭhen fo a ni lawm ni - Napoli leh Osimhen hmangaih thawnthu pawh a tluang reng thei bik lo a, tam takin 'one-season wonder' an tih pawh hnial harsa tak a ni ve tho.

Napoli-in Serie A champion ni chunga season hmachhawn zinga season hmang chhe ber record an siam a, club neitu Aurelio de Laurentiis chuan fan-te hnenah ngaihdam a dil hial - club sporting director Cristiano Giuntoli leh coach Spalletti chhuak chu chhuanlam tling a ni bawk.

Spalletti thlaktu Rudi Garcia lahin Napoli champion season-a an match a en miah loh thu a sawi mauh a, Napoli hriatchian ngaihna a awm lo! Spalletti hnuaia an game dak thlarh a bo a, eng game nge khelh an tum aw, tih mai a awl fo.

A chang chuan Osimhen zawngin long ball a tam hret em ni chu aw, tih tur a ni a, Nigerian striker kutah an innghat pum hlum lutuk a, Osimhen tan tih vek sen a ni bik lo.

Zawhna chhanna

Heti chung chung hian Osimhen hian a hna a thawk ṭha thawkhat viau - match 32-ah goal 17 a khung a, assist vawi li a nei. Heti chung hian season laklawh laiin Africa Cup of Nations a la khel cheu zawk!

Mahse, season tawp hma January khan club neitu De Laurentiis chuan Osimhen chhuah tur thu hi a sawi a, a hma lawk December-ah contract thar ziak mah se, Napoli a la awm chhung rei lotêa a hlawh tihpunna leh buyout clause a neih theihna tura tih a ni mai.

Season hmasa nipui transfer-ah pawh khan Napoli hian Saudi Arabia aṭanga dawrna tam uchuak tak chu an lo hnar tawh a, an beisei ang erawhin thil a kal lo - pound maktaduai 110 ngawt an chhiar avangin club an hla zel a, tam takin heti zata lei hnua hlawh tamtir an huam lo.

Ṭhenkhat chuan Napoli an duham mah mah an ti a, an dem. Mahse, AC Milan player Rafael Leao leichhuah tum tan £147mtd insen huam a ngai a, Atalanta-a season khata goal 10 khungtu Rasmus Hojlund chu £72mtd a ni bawk - Napoli-in heng hi an hmuin an hre ve vek a, tlawm taka hralh an duh lo a ni mai. Tu nge dem thei?

A chinfelna

Chelsea-in lakluh tumin an hel reng a, mahse, Osimhen-a hlawh ngiat chu London club hian tam an ti a, an inrem thei lo - Saudi Arabia club Al Ahli pawhin duh mah se, Napoli chhiar zat chu tam an ti a, lei chiah an ngai lo.

Napoli director Giovanni Manna chuan, "Victor hian chhuah ngei a duh thu chiang takin a tilang a, keinin a hlimna tur kan ngaihtuah," a ti a, deadline day hmaa a chhuah hman loh avangin fans ṭhenkhatin Osimhen an khawngaih a, Napoli Serie A squad-ah a tel lo bawk nen - a hma hun zel tur an inrinsiak nasa hle.

A tawpah transfer bazar la hmang zo ve lo Galatasaray an lo lang hlawl a, season tawp thleng loan-a khel turin Turkish club hi a zawm daih. Football khawvel a barakhaih a, tam takin mak an ti.

Italian chanchinbu tam zawkin, "Tawpna duhawm lo tak a ni," an ti a, kum hnih lawk liam taa Naples khawpui sawi nghingtu, kum 33 hnua an league nomawi hmasa ber chawipuitu Osimhen-a khelhna tur Galatasaray hi ropui tawk an ti lo.

Mahse maw...

Theihnghilh loh tur chu Osimhen hi Didier Drogba ngaisangtu a ni a, a idol club hlui Galatasaray tana khelhna chance awm hi bawhpelh a duh bik lo niin a lang - hei mai a ni lo a, a loan hun a zawhah Turkish club hian a ngheta lei theihna dan an nei lo.

He tah pawh a la tawk lo cheu - Italian leh Turkish media ṭhenkhatin an tarlan dan chuan Osimhen hian top 10 club list a siam a, chung zinga club-te chuan thlasik transfer-ah an beisei a nih chuan January-ah Galatasaray hi a chhuahsan thei ang.

Tin, transfer a theih leh meuh chuan a lei theihna dan hi £63mtd-ah a tla tawh dawn nia sawi a ni a, club tam takin hei hi hre ranin, tuna to uchuak taka lei hi an duh lo a ni ve thei - January-ah club ropui tak tak an intlar put lo ang tih tu nge sawi thei?

Hriat tel tur chu Galatasaray hi team ṭha tak an ni, tih hi a ni - Osimhen bakah hian Uruguay keeper lar Fernando Muslera, Chelsea attacking midfielder hlui Hakim Ziyech, Arsenal defensive midfielder ṭhin Lucas Torreira, Argentine striker lar Mauro Icardi, Belgian forward pahnih Dries Mertens leh Michy Batshuayi te neitu an ni.