Champion leh kan tum dawn - Arne Slot

League Cup champion Liverpool chu zanin dar 12:30 hian an inlan dawn a, tun season-a an League Cup match hmasa ber turah hian Premier League club West Ham an hmachhawn nghal dawn - Reds tan a awlsam lo ang.

League Cup third round chauh a la ni a, Liverpool hi an vanduai ti pawhin a sawi theih - Premier League-a an elpui langsar Manchester City, Arsenal leh Chelsea te chuan Premier League hnuai lam club vek an hmachhawn!

Liverpool boss Arne Slot chuan, "Liverpool sulhnu hi ka hrechiang a, nikuma thil thleng pawh ka hria - kan champion a, champion hlutzia pawh ka hria a ni.

"League Cup-a kan match hmasa ber tur chauh a la nih avangin champion sawi nan chuan a la hma mai thei a, team ṭha tak West Ham kan tum dawn bawk. Mahse, vanneihthlak takin Anfield-ah kan khel dawn a, kan tan game pawimawh tak a ni ang," a ti.

Champion lai Liverpool coach Arne Slot chuan nomawi humhim an tum thu sawi zuiin, "Season hmasaah kan champion tih kan hria a, chumi humhim chu kan tih tur a ni. He nomawi chawi leh tur hian kan theihna zawng zawng kan hlan dawn," a ti a, a ti mai mai lo.

English football-ah Premier League leh FA Cup ten ngaihhlut an hlawh deuh bik ṭhin a, mahse, tun hnaiah club tinten hma an sawn avangin League Cup champion nih pawh a har sawt a, tun hma zawng aiin a hlu ta bawk.

Carabao Cup tia hriat hlawh bawk inelnaah hian Reds hi vawi 10 champion tawhin, anni aia champion hnem an la awm lo - an record chhawm nun zel an tum. Reds hian Arne Slot-a hnuaiah match ruk khel tawhin vawi nga an chak a, rin loh taka Nottingham Forest an ngam lo tih loh chu tlawm an la nei lo.

Reds hian an league match hnuhnung berah Bournemouth chu 3-0 in an sawp a, an inringtawk hle. Zanina an hmachhawn tur West Ham hian coach thar Julen Lopetegui hnuaiah intuaithar tum viau mah se, beisei an la phak thei lo thung - league match li an khelh tawhah point li chiah an la nei a, League Cup second round aṭangin anmahni ang thoa top flight club Bournemouth chu 2-0 in an pet chhuak thung.