Davis Cup khel tur zingah Nadal

Ram leh ram mipa tennis team hmanga inelna Davis Cup Final khel tur Spain chuan an ram aiawh tur a puang a, hliam vanga hun rei tak chawl tawh Rafael Nadal hming tarlan tel a ni.

World number 1 hlui Nadal hi a vanglai a liam tawh a, hliamin a tlak buak reng bawk avangin tun hnaiah a inkhel tam lo. Mahse, Spain aiawh tur hian - Carlos Alcaraz, Roberto Bautista Agut, Pablo Carreno Busta leh Marcel Granollers te nen koh an ni.

Paris Olympic-ah khan Nadal hi a inlan a, a hnu lamah inelna a la hmachhawn leh lo - Grand Slam hnuhnung ber US Open aṭang pawhin hliam vangin a inhnukdawk, an ram aiawh hian a feh chhuak thei ngei ang em, tih chu zawhna a ni ang.

Davis Cup vawi ruk champion tawh Spain hian November thlaah inelna an hmachhawn dawn - Netherlands nen quarterfinal an khel dawn a, ruahman dan chuan inelna hi November 19-21 chhunga khelh tur a ni.

Champion lai chu Italy an ni a, world number 1 Jannik Sinner hoin an inlan ang - Italy hian an nomawi humhim an tum dawn a, an champion leh thei a nih chuan kum 2013 hnua hlawhtling zawn leh thei hmasa ber an ni ang.