Rybakina a chawl rih dawn

Wimbledon champion hlui Elena Rybakina chu a hnungzâng a hliam a, hei vang hian tun hnaiah a inkhel thei dawn rih lo - Beijing leh Wuhan Open khelh tur aṭangin a inhnukdawk rih a ni.

World number 4 Rybakina hian season a hmang chhe lo. Brisbane, Abu Dhabi leh Stuttgart Open nomawi a chawi, mahse damlohna leh hliam vangin tournament ṭhenkhat erawh a khel thei lo thung.

Wimbledon semifinal a khelh hnu lawkah hliam vangin Paris Olympic leh US Open a khel thei lo zui bawk. Rybakina chuan, "Ka hnung na vangin Asia khawmualpuia tournament ka khel thei dawn lo.

"Dam leh thuai turin theihtawp takmeuh ka chhuah a, ka damdawi lam thiamte chuan inkhel rih lo turin min ti. Kei pawhin ka hriselna dinhmun ka ngaihpawimawh hmasak a ngai ve bawk a ni," a ti.

Kum 25 mi Rybakina hi November 2-9 chhunga khelh tur WTA Finals-ah erawh inlan ngei a tum, tun season chhunga an chet dan ranking tehnaah chuan a sang zual pathumna a ni mek a ni.