Lakers tan NBA Finals a hnai

Los Angeles Lakers tan NBA Finals 2020 khel turin match khat chauh chak a ngai tawh. LeBron James awmna Lakers hian nimin zing khan Denver Nuggets chu 114-108 in an hneh a, Western Conference finals series-ah 3-1 in hma an hruai.

AdventHeat Arena-a inkhelah Lakers lamin bul an ṭan fuh a, quarter hmasa berah point sarihin an sang zawk. Nuggets lam hi 2 leh 3 quarter-ah point hnih ve vein an sang zawk ve thung. Mahse quarter hnuhnung berah Lakers bawk sang leh zawkin harsa lutuk loin hnehna an chang.

Anthony Davis chu Lakers tana point nei hnem ber a ni, ani hian minute 41 chhungin point 34 a nei. James-a'n thlawp ṭhain point 26 a thawk chhuak bawk a, player dang zingah point 20 nei tling awm ve lo mah se hnehna an chan nan a tawk.

Denver Nuggets tan nidang ang bawkin Jamal Murray a hmuhnawm leh hle. Murray hian point 32 ngawt nei mah se 3-point  neih tuma a 'attempt' zawng zawng a hlah vek a, hun pawimawh laiah a vannei tawk lo.

September 27, Pathianni zingah game 5 an khel leh dawn, a chak zawk hian Eastern Conference Finals lam intawng Miami Heat leh Boston Celtics inkhela chak zawk chu NBA Finals-ah an hma-chhawn ang.