Arteta vangin ka cham - Auba

Pierre-Emerick Aubameyang chuan tun hnaia contract a ziah thar chungchang a sawi a, chhuah duhna rilru pu hman mah se manager thar Mikel Arteta hnathawh a rin ngam vanga cham chhunzawm a nih thu a sawi chhuak.

Auba-a'n contract a neih lai kha tun season tawp ruala tawp tur a ni, season thum dang Emirates Stadium-a cham turin contract a ziak leh tawh thung - a hlawh zat tur chiang taka tarlan ni lo mah se Premier League player zinga hlawh hnem ber niin media lamin an tarlang.

Gunners captain Aubameyang chuan, "Contract thar ka ziah chhan pahnih a awm, a chhan hmasa zawk chu Mikel Arteta a ni. Ani a rawn lan chinah khan thil hrang hrang kha a ṭha zawngin a kalpui a, kawng dikah min hruai a ni.

"Arteta kaihhruaina hnuaiah inrintawkna kan nei a, kei ngei pawhin hma ka sawn phah. Ka cham chhan dang pakhat chu Arsenal legend ni chuang nomawi chawi ka duh vang a ni," tiin North London chu nomawi chawi pui a duh thu a sawi bawk.

Kum 31 mi Auba hi striker ṭha tak ni mah se a football hnuhnung lam a hmang ṭan tawh. Barcelona leh Inter Milan ten lakluh tumin hel mah se Gunners tan a khel chhunzawm zel ang. Auba chuan, "A nihna tak sawi ila Arsenal chhuahsan turin ngaih-tuahna ka seng hman, hun remchang ṭha tak ka nei a ni," tiin sawmna duhawm a dawn thu a sawi. Gabon international hian tun season league match hnih khelhah goal khat leh assist vawi khat a nei tawh.

Arsenal hian Thawh-ṭan zanah Premier League champion Liverpool tlawh turin Anfield an pan dawn a ni.